港股連續反彈兩日，共上升670點，但一日就跌凸，噚日恒指最低21098，大跌814點，收市21220，跌692點，成交唔多，只有637億元，大戶攞住幾隻大藍籌嚟開刀，散戶則懶懶閒，冇跟風拋售。
大市未跌完，繼續尋底，但恒指成份股PE已落到13倍水平，支持力開始浮現，不宜看得太淡。
在內地宏觀調控下，內地銀行仍紛紛報喜，業績繼續有強勁增長，08年（12月年結）的預測PE只有11倍至13倍，頗為吸引。大市尋底，提供一個低吸機會，現時分段上車，揸中線，保守估計可獲利2至3成。
繼工商銀行（1398）在上周四（7月3日）發出「盈喜」後，翌日就有招商銀行（3968）同中信銀行（998）加入行列，相信餘下3行亦會有好消息。
大行多看好
根據中國會計制度，工行今年上半年淨利潤增長逾50%，其中以利息、手續費及佣金的增長較快，同時實行新的所得稅率亦令盈利大幅上升；跟住而來嘅招行同中信銀行仲勁，招行上半年利潤增長逾倍，中信銀行更大增150%以上。內銀股股價經大幅回落後，有佳績刺激，相信未來一季會有較佳表現。
工行為內地最大的商業銀行，去年上半年淨利潤409.4億元人民幣（下同），全年815.2億元，升65.5%。今年首季獲利331億元，同比增長77%，以上半年增長50%計，即淨利潤達612億元，但應該不只此數，估計08年全年盈利可達1280億元，升57%，每股盈利0.383元（折約0.433港元），預測PE只係11.8倍。
大行多看好內銀股前景，瑞銀最新研究報告指工行資產質素不錯，未來3年貸款增長10%以上，淨息差可穩定於2.7%水平，係各大型內銀H股中的熱選對象，維持「買入」評級，目標價6.78元；DBS唯高達將工行目標價提高至7.10元，大摩則維持「增持」評級，目標價7.20元。以大行平均目標價7元計，工行有35%的上升空間，到價時預測PE16倍。