冠亞商業（104）創辦人楊仁（又名楊啓仁）自06年底回朝，重掌主席職位後，經過1年多嘅努力，已將公司扭虧為盈，由07年3月止年度虧損近5000萬元，改善至08年度盈利6131萬元。
佢噚日喺記者會上話，吸收咗以往嘅教訓和經驗，而且交咗好多學費之後，學識咗要專心一致做好每一件事，唔會好似以前咁分散投資，所謂唔熟唔做。而且喺拓展業務方面要小心謹慎，好似𠵱家國內零售熱，好多做內地零售業務嘅上市公司，都大張旗鼓，每年新增分行數十以至上百家，但佢只係計劃今年新增3至5間店。
冠亞喺90年代因為投資內地房地產失敗，邀請長實（001）入股拯救；99因經營不善，搞到公司損失嚴重，並俾奇盛（174）奪去控股權，直至06年底才重新主政。