昨日港股大跌，曾跌過800點，散戶都擔心港股會下試三月低位。嘉賓認為，市況未有明顯向上訊號，但只要再等終極一跌，大市就可反彈。
楊：主持 楊慧玲
沈：英皇證券研究部主管 沈振盈
楊：今日（即昨日）港股跌近3月低位，大家都好驚，係咪會一試3月低位？
沈：市況仲未出現明確向上突破嘅訊號，噚日升到10天線已經有阻力，今日（即昨日）回吐好正常，只係估唔到回吐力度會咁強；會唔會跌到3月低位真係無人可以估到，不過我覺得市場上利好消息仲未喺個市反映出嚟，可能要等終極一跌，個市先可以返轉頭，現時最重要控制自己資金，可以的話留一注資金，等確定轉勢先去買貨；有好多正股都已經跌到合理價值區，就應用繼續守。
楊：中央對內房股放寬調控係唔係可以令佢哋起死回生？
沈：絕對可以，中央只要放寬少少，都已經可以令內房業起死回生，因為內地股民面對逆境嘅情緒智商係比較低，個市跌咁多都係心理因素多於實際，只要有一個正面因素出，個市要上返去就好易。另外，經濟同社會民心始終都唔可以太差，加上外圍經濟咁差，經濟過熱情況又唔係太憂慮嘅情況之下，我相信要放寬嘅機會都幾大。
搶先貼股
內銀反彈勝保險股
麥先生：我5.86蚊入咗建設銀行（939）同8.7蚊買入交通銀行（3328），會唔會分別上番6.5蚊同10蚊？
沈：我相信嚟緊反彈，內銀股一定快過保險股。建行6.2蚊應該有阻力。交行上10蚊可能難啲，因為大關口壓力大。
期指淡倉仍主導
施先生：期指𠵱家先得9萬8千張未平倉合約，但今日（即昨日）成交有8萬幾張，佢應該會造上，定係隊落去先上呢？
沈：𠵱家個勢梗係隊緊落去啦，但係期指未平倉合約走勢就要睇過程推斷，譬如轉完倉個倉底唔夠，如果一路落一路減倉，就表示向下唔會太深，但𠵱家未出現。仲要睇番上去嗰吓會唔會加倉，先反映到個勢會唔會持續。
EMAIL解答：港交所有實力
阿葉：我之前聽咗沈大師講，港交所（388）會升到175蚊，所以我喺145蚊買咗，𠵱家點算？
沈：145蚊買真係唔係咁靚，不過喺呢個位唔應該止蝕，因為港交所唔係當年科網股，佢唔會跌到一文不值，如果仲有彈藥，不如吼低位溝貨，等佢彈個時修定之前嘅錯誤。
基建股唔值博
小股民ANDY：我喺11.5蚊買入中國鐵建（1186），可唔可以再溝貨呢？
沈：基建股我都覺得市盈率係貴，就算有好多定單，將來毛利率都未必可觀；現時有咁多低市盈率、前景又唔係差嘅股份，點解要買高市盈率呢？基建股跌到呢啲位其實仲未買得囉。
收市後4:30pm
click入 http://finance.appledaily.com以webcam參與節目及收看
歡迎phonein28698262暢談心得亦可email至mailto:[email protected]搶先貼股