香港酒客對「掟飛鏢」從不陌生，估唔到車路士禮拜一開操，新帥史高拉利卻十足十「戇豆先生」發現「彩色電視」一樣，對「掟鏢」嘖嘖稱奇：「我淨係睇電視見過喳！」又承諾之後會自編自導一部「鏢」殺令，藉此加快融入球隊文化，並反擊英國傳媒白眼！
搞爛gag英國腳啞晒
上季「雙亞王」車仔周一開操，從未執教歐洲球會嘅「大菲」史高拉利置身豪華訓練營高咸（Cobham），鬧出連番（冷）笑話，更自言唔識英國傳統消遣運動「掟飛鏢」；大菲天真無邪話：「咁新奇嘅？呢啲傢伙我淨係睇電視見過喳！」之後，車仔班球員就解釋番飛鏢查實係該國消遣運動，佢哋就幾乎每日都會玩兩手云云。
於是，「大菲」順勢而上：「哈哈，等我返屋企練一練，之後同大家切磋切磋。」仲應承會練到好似英國著名飛鏢手菲泰萊咁勁，咁就可以同球員打成一片。然而，周二正式面對求大俠行家嘅「大菲」，練定鏢都啱，事關一開「咧」，佢要遇咗做乜都會俾英國人插到開巷，希望到時呢支鏢可以幫佢減減壓，從容面對外界嘅批評。
首日開操，包括備受轉會傳言纏身嘅林柏特、杜奧巴、舒夫真高等悉數出席，而「大菲」見咁人齊當然要發表講話，並想幽班英格蘭球員一默：「如果喺歐國盃早啲認識大家就更好！」可惜笑話變成爛gag，只有佢自己識笑，在場球員鴉雀無聲，睇嚟「大菲」真係要學學英式幽默嘅精髓喇。
祖高爾黑仔撞車幸無恙
唔知係咪「大菲」腳頭麻麻，喺訓練場教佢玩視力測試嘅祖高爾，日前就遇上車禍，俾架40噸重嘅貨車「隊車尾」，價值5萬鎊（約77萬港元）嘅RangeRoverVogue靚車慘遭「毀容」，猶幸車毀人無恙，算係不幸中大幸。