華華噚日收到大家樂（341）傳真通知，話原定喺九龍灣國際展貿中心君豪會舉行嘅業績發佈會，改咗去黃埔花園蔡瀾美食坊樓上嘅博藝會，呢個改動，唔知跟君豪會同九展業主合和（054）租務糾紛有冇關係呢？
噚日都有報道話，合和指君豪會拖欠今年5、6月租金，又冇維修漏水問題，仲冇交電費及垃圾費，所以決定唔跟君豪會續約，前日合和仲玩踩場，喺君豪會搞婚紗展銷會前，出嚟玩踢爆。
君豪會係時代生活集團旗下嘅私人會所，話晒大家樂主席陳裕光（圖）都係呢個集團嘅掛名名譽主席，佢老婆羅寶靈仲係集團嘅執行董事，負責營運業務，家陣君豪會同合和搞到咁唔愉快，大家樂當然避之則吉，搵第二個場舉行業績會好過。
點解？萬一個業績會喺君豪會裏面搞，合和又嚟踩場，到時一大班財經記者又在場，都咪話唔頭痕。