42歲的陳雅倫近日積極再戰江湖，繼前年她在電影《放逐》中露點演出，以及於去年為有線拍攝《補習天后》一劇後，昨日她出席一美甲活動時，一襲低胸裝再加幾個拋胸動作，即時搶盡同場姐仔陳霽平、陸詩韻和姚樂怡風頭。陳雅倫又自爆去年患上急性腦膜炎，幸及早發覺，最終有驚無險。
陳雅倫、陳霽平、陸詩韻和姚樂怡等昨日出席在尖沙嘴舉行的美甲活動，久沒露面的陳雅倫，穿上一襲紅色低胸裝出現，加上她不時彎腰俯身，登時波濤洶湧，令她成為全場焦點，撼低一眾姐仔，42歲的陳雅倫果然寶刀未老。
服藥肥又腫
陳雅倫表示去年12月患上急性腦膜炎，幸好發覺得快，最後總算有驚無險，她說：「嗰晚突然間又暈又嘔，個頭又痛到好似裂開咗，好彩有個女朋友發覺得快，之後咪即刻送我去醫院，醫生話係急性腦膜炎，住咗兩日醫院返香港再做檢查，醫生話我個腦有白點，可能曾經輕微出血，要食半年藥，不過啲藥食到我又肥又腫，皮膚又有問題，後尾仲因為食得太多藥，搞到胃潰瘍㖭！」
陳雅倫坦言患病後人生觀大改，她說：「醫生話我可能畀自己太大壓力，加上休息時間又唔夠，以前我覺得人哋話祝你身體健康真係好老土，但經過今次之後，發覺原來健康真係好重要。」
陸詩韻激動
此外，昨日又有消息指陸詩韻與富商陪玩兼過夜，她略帶激動地說：「我有睇過報道，我都唔識呢個人，我一向都靠自己能力，唔係靠男人，況且我屋企又做生意，根本唔使搵呢啲錢。」
另一方面，早前有份與鍾欣桐（阿嬌）赴美國拍攝名導演奧利華史東（OliverStone）新片《W.》的陳霽平，對於當日的情況統統婉拒回答，她說：「𠵱家仲未講得住呀，好快會有公佈，我試鏡嗰日見唔到阿嬌，淨係知佢有份。」
採訪、攝影：何慧斯