世界自由球大師賽上周六喺美國侯斯頓舉行，大熱門朗拿甸奴（細哨）、廸高、美斯同廸比亞路，統統無緣王者寶座，最後攞走100萬美元（約779萬港元）王者獎金嘅係巴塞隆拿中堅馬基斯，真係恨死人啦！
奧運金牌都冇咁多錢
本屆大師賽共有28名球員參賽，其中5人為門將，結果馬基斯成罰球王兼做百萬富翁，英格蘭門將占士就力壓托度、基拿等名將，成為罰球撲救之王，攞走50萬美元獎金。其餘參加名將有費蘭度托利斯、祖連奴比南布肯奴、羅馬里奧及皮利斯等人。
我求大俠覺得最意外嘅唔係馬基斯跑得出，而係獎金高到嚇死人。大佬，好多運動員練足十幾年，好唔容易先贏到奧運金牌，都攞唔到咁多獎金啦！呢班球壇大爺係咁意射幾腳，就袋走百萬美元，你話呢個世界幾唔公平呢？
呢項比賽亦有公平之處，就係巨星往往贏唔到。好似04年首屆賽事，冠軍就係荷蘭嘅爾廸林，亞軍係中國嘅申思，施丹都係僅排第5。不過，賽事始終屬於初生階段，好多時都會突然夭折，好似05、06年就無奈取消，今年比賽原本07年尾就舉行，結果推遲至上周六舉行。
孫祥甩底災民冇福
呢個自由球大師賽其實幾有睇頭，唔明點解本港收費電視台唔轉播，等香港球迷開開眼界呀嘛！參賽者分別從離門18米、21米同25米位置主射，可自由選擇位置且有3次機會；3個距離射入分別得唔同分，頭一腳入波同第3腳入波又唔同分，射中門柱同門楣得1分，最後高分者勝。
我求大俠最唔明就係點解中國嘅孫祥臨時甩底，唔覺意贏咗將獎金捐畀四川地震災民，你話幾有意義呢？