恒指上周五彈升181點，但專家認為今次反彈難以重返26000點水平，因為金融市場及經濟問題未完全解決，但內銀股在盈喜消息支持下，相信有機會突圍而出。
黃：亨達集團研究部董事 黃敏碩
楊：主持 楊慧玲
楊：期指（周四）收巿高水成90點，美國（周五）又休市，唔知星期一港股可唔可以延續呢個反彈勢頭呢？
黃：大巿成交得500億，唔係好配合，投資者唔好淨係睇技術走勢，要睇埋外圍，就算反彈，大家都唔好期望去番26000點，23500至24000已經幾盡，始終市場很多問題未完全解決。
楊：工行（1398）發盈喜，大巿先有番啲支持，究竟邊類股份仲有機會突圍？
黃：內銀股表現會較好，因受惠兩稅合併，加上財務管理同非利息收入暫時仲頂得住，國有商業銀行會着數啲。就算內地加息，只要存款息率加得少過貸款息率，息差擴闊都會令大銀行受惠。最擔心反而係啲樓宇按揭貸款業務，會唔會開始出現壞賬同不良貸款，呢方面對細銀行影響較大。
搶先貼股：中糧6蚊才獲利
Alan：我$5.3入咗中糧控股（606），但佢近期幾次試衝6蚊都失敗，係咪應該放咗先？
黃：炒中糧最重要留意內地政策變動，留意住內地通脹同食品價格有無放緩。佢嘅股價徘徊喺$5.2至$5.6，守得幾穩陣，5月之後仲上過6蚊，呢個大位雖然有一定阻力，但仲有條件升，因為佢近期都係自己行多過跟大巿走，抗跌力強。如果真係上到6蚊，你先獲利我都唔反對。
新創建穿19蚊止蝕
李先生：我$20.9入咗新創建（659），想睇吓佢有冇機會上番$22.9？
黃：佢個股價都唔算大起大落，今年一直喺20至25蚊之間上落。呢隻股防守性不俗，搞內地水務，𠵱家又有碼頭業務，仲有啲基建同公用事業，盈利幾穩定，唔好忽略佢早前有份參與嘅一個樓盤，可能都有收益入賬；畀啲時間，畀啲耐性，相信股價會好番啲。不過，當大巿反彈，都係權重股彈先，佢反彈會較慢，你要有心理準備。怕後市唔明朗，跌穿19蚊可以先止蝕。
收市後4:30pm
click入 http://finance.appledaily.com以webcam參與節目及收看
歡迎phonein28698262暢談心得
亦可email至mailto:[email protected]搶先貼股
