就嚟選舉，候選人最驚就係被揭醜聞、緋聞之類。不過，公民黨梁家傑噚日居然自爆曾經偷食，仲中埋招㖭。好彩，此「偷食」不同彼「偷食」，佢只係偷食零食，唔覺意食咗啲含基因改造成份嘅零食啫。
梁家傑噚日出席綠色和平基因改造食品檢測結果發佈會，佢望見枱面嘅卡樂B粟一燒，眼都唔眨，流晒口水。佢話，做細路嗰陣，邊有咁多零食選擇；到𠵱家人到中年，又被梁太睇到實一實，唔畀佢亂食零食。
同仔仔夾計買零食
但佢有時都忍唔住，同仔仔夾計靜靜雞買包卡樂B粟一燒嚟偷食，但噚日聽見綠色和平嘅檢測結果，先知卡樂B粟一燒原來含有基因改造成份。
梁大狀話，消費者有知情權，基因改造食品應該清楚標籤，列出是否含有基因改造成份，等消費者決定買唔買嚟食。佢仲拍心口話，下定決心戒口，以後唔再食粟一燒喎。