「名人飯堂」利苑今日喺九龍灣德福廣場開第15間分店，主席陳樹杰同一班高層，會現身招呼傳媒試食。
講起利苑，華華記得，前嗰排新地（016）郭氏三兄弟內訌時，就有傳媒影到郭老太同三佬郭炳聯等喺中環IFC利苑飲茶。
鮑魚燕窩任試食
其實，跟開郭家新聞嘅記者朋友都知，想有機會同郭老太「偶遇」，可以去利苑碰吓運氣，因為郭老太係利苑常客。
不過，華華今日唔講人哋家事，轉而講吓食經。之前華華同利苑老闆陳樹杰傾過偈，佢同華華講，烹飪係一門學問，「做廚要分辨得出味道好同壞，先煮得出好菜」，所以利苑嘅廚師唔止要苦練刀章技術，亦要日日試食，名貴如燕窩、鮑魚都有得食，食到識分高下為止。
咪以為有得食好過癮，食完要「考口試」。陳樹杰每日晏晝三點必定落店試菜，到四點同各地分店員工開視像大會，風雨不改，員工隨時都要準備被提問，啞口無言唔識答會捱鬧。
陳樹杰自幼食得腌尖，但講到入廚，開設利苑前其實係零經驗，開店之後，佢總覺得請返嚟嘅大廚煮得唔好食，換完又換，終於決定親自出馬。佢講番學廚嘅日子，燒乳豬燒到自己發高燒。
每月幾萬銀買橙
唔單止技術，陳樹杰連員工嘅飲食習慣，都要依足佢嘅保健原則，每日供應畀員工嘅伙食必定有菜有生果，單係每月買橙都要十萬八萬。