《信報》辦酒會，賀客盈門，擠得水洩不通，轉身都驚住碰嚫人。左丁山向右一小轉，再向左一小轉，幾乎碰嚫一位靚女，好彩係識得嘅旅遊界靚女總裁Ｌ啫，否則會出現尷尬場面。總裁Ｌ三句不離本行，同左丁山講：「有冇計劃去北京睇奧運？」左丁山話：「我最怕到萬人空巷嘅地方擠逼入場，喺屋企睇電視好過，況且北京奧運期間，酒店房租好貴噃。」總裁Ｌ答：「舊年就係咁講，現在要更正。話收五千蚊一晚嘅酒店已經大減價，保證相宜，我哋間公司有大把房，你去北京睇奧運，即管出聲。」
次日看報，知道《蘋果》記者在北京被逐，回鄉證即時失效，記者只係到北京採訪京奧新聞者，北京何解咁驚青呀，一個香港《蘋果》記者入到京城，行去邊都有人監控啦，邊度有私隱㗎，照計唔使將記者驅逐，令國際奧委會尷尬啫。於是想起總裁Ｌ之言，佢話北京酒店房間突然在京奧前一個月供過於求，羣起割價，主因係中央之京奧思維變咗。以前想要辦一個非常熱鬧、顯示國威之「最好奧運」，但自從發生西藏、奧運火炬傳遞及四川事件後，已改為要搞一個不出亂子，平平安安嘅奧運會，外國人唔嚟的話，一於唔希罕，實際嘅做法就係收緊簽證，防範外國「壞份子」入境，一於寧枉毋縱。此項政策直接結果就係遊客不來，北京酒店叫苦。
去年炒股炒樓，一味講「奧運概念」，唔少人認為中央要面子，一定頂住股市，直至奧運完畢。同時亦有人講美國選舉概念，以為美國總統大選年期間，共和黨以至聯儲局主席伯南克皆會推出刺激經濟措施，托市護市。誰知道，呢啲概念專家通通錯晒，中國Ａ股大跌、美國股市下瀉，技術上已進入熊市。年初相信奧運概念，選舉年概念者無不輸到一仆一碌。京奧一於嚴格保安，寧願犧牲旅遊利益。如果揸住與奧運扯上關係嘅股票，盡快沽售不足惜。