周海媚（海味）、苗僑偉、吳卓羲同江若琳成班無綫劇集《學警狙擊》嘅演員，前晚約埋台前幕後嘅工作人員喺銅鑼灣食自助餐，苗僑偉一到場就爆料，話呢餐係由海味請客，但海味扮唔知情話：「我唔知，冇所謂，難得大家開心。」
夫妻要互相遷就
苗僑偉前晚帶埋太太戚美珍一齊嚟，對於羅嘉良同太太方敏宜結束10年婚姻，同羅嘉良唔係咁熟嘅阿苗就話：「好可惜，人哋屋企嘢，我真係唔方便發表，兩公婆分得開梗係深思熟慮，咁大個人，有咁嘅決定應該商量咗好耐，有自己嘅原因。」對於羅嘉良指離婚係夫婦間欠缺溝通，同戚美珍結咗婚成18年嘅苗僑偉就認為：「每個家庭都有本難念的經，夫妻間要互相遷就同容忍先可以長久。有意見有分歧嘅時候，邊個讓邊個係最關鍵，我成日同老婆講，退一步海闊天空，自己會退讓，令家庭和睦相處，出去做嘢先安心。」
嘉良上海訴心聲
羅嘉良噚日喺上海接受商台電話訪問，為咗避免受騷擾，嘉良最近都熄咗電話，商台係經佢前妻先搵到佢。嘉良話前妻同囝囝喺外地旅行，大家關係好好，分開唔係因為有第三者。回復單身嘅佢話感情事順其自然，圈中圈外都無所謂，兼且會盡量學識同伴侶分憂。