由泰山石化（1192）及其前行政總裁張震遠牽頭、用咗兩蚊嚟註冊成立嘅香港商品交易所，招嚟唔少風雨流言，話就話私人發起，但財政司司長曾俊華早早表態支持，難怪傳言話，張震遠可能係由特首煲呔曾指派成立商交所。
家陣傳媒每次見到商交所主席張震遠，例必問佢同特首係咪識咗好耐，交情如何之類問題，張氏總係例牌耍過。不過，據新一期《財經》雜誌報道，張震遠被記者再問到佢同曾特首嘅關係時，佢「不諱言跟特首曾蔭權相識多年，但拒絕評論是否曾氏『指派』他辦商交所。」
佢仲話，06年9月曾跟煲呔曾及財金官員見面，大家首次提到成立私人商交所，由於佢同政府立場一致，所以得到支持。據報道講，93、94年張震遠做香港中央政策組全職高級顧問一職，正係由煲呔曾推薦。兩人相識幾多年，自己數數手指。