葉翠翠豪擲三千萬買樓，引來四方八面批評，先有吳文忻指她是「港姐股神」，其後死敵袁彌明直指她貪慕虛榮，講大話作古仔。昨日葉翠翠對於回應買樓的事感到煩厭，她重申買樓對她來說是一件開心事，大家應該替她開心，新屋正在裝修，她預計花6位數字。
葉翠翠、JaniceMan和一班女模昨日在信德中心任「夏日大曬俏衣裳」模特兒，並DIY多套沙灘裝為奧運打氣。最近被踢爆豪擲三千萬買了兩層豪宅的翠翠，令多位過氣港姐嘩然，吳文忻明讚暗踩葉翠翠是「港姐股神」，連陸叔都要行開，至於翠翠死敵袁彌明又借勢狂寸她講大話。
「只有父母影響我」
連番遭受批評，葉翠翠終於按捺不住，對於袁彌明指她貪慕虛榮，她說：「呢個唔代表係我嘅心態，亦唔代表係娛樂圈藝人嘅心態，只係佢自己講出來，我不嬲努力做嘢，其他嘢我唔理，亦唔會介懷同唔開心，只有父母會影響我嘅想法，其他人唔會放喺心入面。」
對於再三被追問買豪宅事宜，翠翠說：「每次出來都係回應呢件事，其實我買樓係開心事，大家應該祝福我，戥我開心先係，𠵱家我間屋裝修緊，應該會用6位數字去裝修兩間屋，以簡約為主。」
JaniceMan拒水着
此外，JaniceMan在暑假接了很多泳衣騷，但她堅持不會着泳衣上陣，她說：「入行咁耐都係着過一次三點式拍眼鏡廣告，嗰時仲係着住件背心，其實一開始都已經同公司講唔會接泳衣騷。」但泳衣騷酬勞高，問JaniceMan何時會解禁，她說：「我都過咗18歲，冇話限住自己幾時會着泳衣，都係要睇個廣告性質，同埋睇吓健唔健康。」
採訪：楊潔雯
攝影：陳慧安
