摩笛追魂再顯神效，雅居樂（3383）短期（未來15日）股價好大機會反彈之報告，難得大摩竟然毫不避嫌，既入股公司樓盤發展項目，同時唱好股價。不過，唔好忘記大行部門之間係有所謂的防火牆，若有人質疑，大條道理話研究部與投資部門互不相干。
傳有穩定樓市措施
大行唱好之外，近日各大報章報道，中央已關注到國內樓市極速萎縮，可能危及經濟發展，有關方面正醞釀推出穩定樓市措施，包括宏調可能放鬆等等。中央早前見地產狂炒即落重藥打壓，到現在一見唔對路即走回頭路，證明內地永遠都係政策主導，但係樓市是否救得了仍有待觀察，事實上中央難道不想內地股市止跌回穩？
內地政府忽然對樓市緊張起來，原因之一相信是有發展商遇上財務危機，再不出手將有大量公司倒閉，連帶一大埋爛尾樓、呆壞賬跟尾。據內地報載，早前一些被天價搶回來的地塊，很多都已因地產商出現資金困難而被收回後貶值重新拍賣，另若干高價拍得的土地退還、賤賣，土地拍賣「流標」、「流拍」等也常出現。
與其說內地樓市高危，倒不如說是內地發展商財政高危，雖說某些地產商高價搶地自嘗苦果，但若再唔去救，分分鐘連銀行都出事。有政策支持，短期內一些被過度拋售，而有一定基本因素支持者應該可望反彈，合生創展（754）、富力地產（2777）等一線尾二線頭公司應該吼得過。