中國證監會自92年成立至今，連埋家陣嘅主席尚福林在內，已經歷五任主席，大陸《東方早報》做咗個小小總結，睇吓打完中證監呢份工，四任前主席同其他中高層有乜出路。
四位中證監前主席包括首任劉鴻儒、周道炯、周正慶同周小川，任期兩至三年不等（尚福林由02年尾做到𠵱家，係做得最長嘅一任）。當中周小川最勁，離開後做咗央行行長，周道炯同周正慶離任後，仍然離唔開官方機構或者組織，前者現任中國太平洋經濟合作理事會中國金融發展委員會主席，後者就做全國人大財委會副主任委員。
過檔基金證券公司
第二把手中證監前副主席同其他中層管理，離任後選擇就多一啲，報道話，前中層官員離職後，特別鍾意「下海」去基金公司或證券公司。亦有人「下海」喺商界打拼，好似由香港北上做副主席嘅史美倫，卸任後先後喺香港多間上市公司做非執董；棄金融而從政嘅，有前副主席屠光紹，佢舊年尾做咗上海市副市長。至於前副主席高西慶同前首席會計師汪建熙，就先後腳入中投公司實戰。