飛輪海成員之一嘅汪東城噚日上午嚟咗香港，佢一出閘就向現場近百fans做出心形手勢，引得fans不停大叫，之後汪東城就由10名保安護送下離開。到咗下晝，汪東城就會合比佢早一日嚟港、同佢傳斷背緋聞嘅唐禹哲，一齊出席喺觀塘APM商場舉行嘅有線第一台成立一周年活動，同場嘅仲有徐小明、肥媽同導演李仁港。
合作捲壽司
汪東城為配合即將喺香港播出嘅新劇《翻滾吧!蛋炒飯》，佢同好朋友唐禹哲分別喺台上表演炒飯同捲壽司。兩人仲非常識做地替台上擔任助手嘅女fans抹汗，就連任司儀嘅有線女主播鄭文都唔放過，令佢喜出望外。雖然汪東城同唐禹哲喺台灣被傳斷背，不過佢哋喺台上就毫不猶豫地將手上嘅食物互餵，引到全場fans尖叫。
汪東城同唐禹哲事後接受訪問時，就話一啲都唔尷尬，汪東城話：「沒有，反而煮食爐的火力不夠讓我蠻尷尬。我跟禹哲前後合作拍了5部戲，默契很好，而且平常戲裏戲外，我們都是這樣子。」之後佢仲好搞鬼反問佢哋係咪好合襯，唐禹哲就話因為經常合作，啲人先至成日見到佢哋一齊，佢話：「因為知道不可能所以不尷尬。」
