11位候選香港小姐昨日參與保良局「萬人健康操」啓動儀式，眾佳麗身體力行齊做健康操，宣揚運動對健康的益處。曾被刊登踎街吸煙照的3號張舒雅，表示參選港姐後每日早睡早起，身心健康，更決定戒煙挽救形象。
保良局為了慶祝130周年及迎接下月奧運，推廣健康生活教育，昨日在灣仔修頓室內運動場舉行「萬人健康操」，11位候選香港小姐應邀出席啓動儀式。眾佳麗參與萬人健康操，表現興奮。
「𠵱家好注重健康」
5呎10吋半高的3號張舒雅身形高䠷，手長腳長，做健康操時顯得有點笨手笨腳，似乎很少做運動。她早前被踢爆是一名愛蒲又抽煙飲酒的夜遊人，日前4號高海寧揚言自己「唔煙唔酒唔夜蒲」，借機暗寸她。張舒雅昨日表示要重過健康新生活，她說：「我頭先好努力做，平時我唔會做健康操，會游水散步多啲，近排早睡早起好健康。」
張舒雅表示已經戒煙，她說：「𠵱家呢段時間，可以話係我咁耐以來最注重健康嘅日子。」戒煙成功絕非易事，不知張舒雅選完港姐之後，會否再次抽煙？她說：「唔會喇，做多啲健康操好啲！」
9號謝靜婷在台上呼籲要注重健康生活時突然「發台瘟」，事後她說：「都唔係好緊張，係我自己身體有少少唔舒服，作感冒。」4號高海寧表示堅持每日做運動，她說：「之前會做gym、跳健康舞，𠵱家冇時間就每朝起身做運動喼弗。」最近高海寧出席活動時，經常面腫腫，她解釋說：「係呀，本身我身體好腫，媽咪有煲薏米冬瓜畀我飲。」
7號梁雅琳跌親缺席
另外，7號梁雅琳缺席「萬人健康操」，港姐統籌陳紫蓮說：「佢因為喺珠海外景跌親，仲未好得番，所以要去睇醫生，佢有三個傷口都腫晒，希望佢快啲好番。佢都好乖，整親都係咁同我哋講唔好意思。」
採訪：楊潔雯
攝影：陳慧安