好多香港人鍾意食壽司，即使近日一再有人食壽司食到屙嘔肚痛頭暈身㷫，我哋呢代食壽司大嘅飲食男女，依然對壽司情有獨鍾，不離不棄。好多壽司店仍然每晚排長龍，可見香港人幾咁長情，幾咁有義氣。但係義氣嘅嘢，都要建基於壽司嘅質素，唔可以盲目崇拜。
小妹最近幫襯老尖一間人氣旺盛嘅壽司店，就發揮出消費者精明嘅一面，喺度同大家分享一吓，等各位日後都多加留意。話說呢間開喺廣東道某大型商場嘅壽司店，有道招牌壽司，叫做「特大帆立貝壽司」，只賣28蚊。嘩！特大喎！28蚊咋喎！有冇咁大隻帆立貝隨街跳呀？睇吓個菜牌，嗰塊貝貝真係長到點地㗎喎。一於試一試先。唔夠五分鐘，特大帆立貝壽司殺到。咦！乜縮咗水嘅！菜牌上長長嘅貝貝，嚟到枱上竟然變咗短到啱啱遮住嚿飯嘅營養不良小貝貝，好可憐啊！
本來28蚊食一客普通帆立貝壽司都算合理，但係間舖頭咁唔老實，貨不對辦，誤導人客，咁就好唔要得。小妹立即舉手向店員查問，問佢係唔係落錯單，整咗隻瘦身版帆立貝嚟，佢好淡然咁話，我哋得一個size㗎咋，呢隻就係特大帆立貝。小妹刻意流露驚嚇表情，再拎出菜牌提出質疑。店員堅持冇出錯菜，小妹惟有要求取消呢碟壽司，理由係貨不對辦。店員見小妹個樣兇過海狼，先肯收番碟嘢，幫我取消。
逢周六、周日刊出
電郵：mailto:[email protected]