33歲的鄺文珣前年與商人應德榮（Andrew）結婚後，於去年底有喜，預產期為下月。原本鄺文珣的老爺奶奶千叮萬囑她懷孕期間不要食生冷嘢，但腹大便便的鄺文珣竟然暗地裏「偷食」，在前日偕丈夫到果汁店飲冰凍的鮮榨果汁，認真曳曳。
懷孕八個多月的鄺文珣，臨盆在即仍十分活躍，前日便見她與夫婿應德榮到中環ifc逛街晒恩愛。前日下午5時半左右，穿上吊帶上衣及緊身四個骨褲的鄺文珣，與丈夫Andrew齊齊出現ifc，肚大如籮的她，與Andrew走到一間名為Mix的果汁咖啡店飲果汁。雖然老人家多會叮囑大肚婆不要食生冷食物或飲品，但記者卻見鄺文珣大啖大啖地飲冰凍的鮮榨果汁，邊飲邊上網，一直陪伴身旁的Andrew由頭到尾未有加以阻止。
逛街冇斬獲
飲完果汁後，鄺文珣與丈夫到連卡佛逛街購物，二人走到男裝部睇皮鞋，鄺文珣先後揀了幾個皮鞋款式給Andrew試穿，但Andrew試來試去也不合心意，二人便轉睇男裝恤衫，但最後仍是空手而回。
記者昨日致電鄺文珣，問她老爺奶奶可有叮囑她不要食生冷食物時，她笑說：「佢哋都有叫我最好唔好食嘅，但佢哋都好開通，一次半次都冇乜所謂嘅。」當日她疑似飲西瓜汁，但鄺文珣急忙否認說：「唔係西瓜汁，係士多啤梨加藍莓再加蘋果汁嚟。我知我飲緊嗰陣，個BB喺度郁吓郁吓㖭。」
買齊BB用品
小生命下月出世，鄺文珣揚言心情緊張，問她有否上堂學習照顧BB時，她說：「未有BB之前已經有上堂，所有BB用品都買齊晒，我班朋友仲準備幫我搞個『BabyShower』，即係BB出世前嘅一個party㖭。」問BB是男是女時，鄺文珣表示希望保持神秘，而下月生產仍未決定開刀還是順產。
採訪、攝影：娛樂突發組