劉志榮月前病逝，其油尖旺區議會佐敦東選區議席要補選，選舉事務處宣佈10月5號投票，提名期由8月14號至27號。
佐敦東選區係民建聯老巢，一般估計民建聯必定派人出選，早前有消息指廟街販商商會主席陳錦榮可能去馬，近日又傳地區大佬級人馬葉國忠癌症康復休養多年後，考慮重出江湖，八方向忠哥查詢，佢話仍在考慮。有熟識佢嘅地區人士則話，希望忠哥健康為重，三思而行。
泛民對呢個位都躍躍欲試，早前曾開過協調會，公民黨、社民連已打退堂鼓，民主黨同民協會再深入討論。八方收到風，民主黨可能派葉樹安參選，民協秦寶山、吳寶珊都有興趣，三人都係落選區議員，圖東山再起人之常情，不過有泛民人士分析，民主派參加補選往績甚差，基本上有輸冇贏，而且今仗十分難打，相信甚有犧牲精神者方適合參選。