記協月前改選新一屆執行委員會，不過主席卻懸空，上屆主席范皓齊因為要專心完成碩士課程，所以不願冧莊，希望交棒新面孔，可惜冇人肯捱義氣，惟有暫時由岑亞志做署理主席。
范皓齊話過去一年工作甚為繁重，營救程翔、奧運採訪安排、西藏動亂等都牽涉新聞自由問題，連淫照風波都要做回應，所以做一屆兩年都夠晒皮。
范皓齊話以佢所知，記協成立40年，今年應該係首次出現主席懸空情況，佢話可能行家太忙，不能兼顧繁重義務工作，佢本來想提名一個前任副主席接班，後來因為種種因素未成事。
署理主席岑亞志嚟自新加坡，係自由新聞工作者，據講近年頗投入記協會務，范皓齊話希望佢工作順利，當然最希望可以選出一個正式主席啦。