自由黨田二少出選九龍西，近月頻頻曝光，據講佢有一定贏面，估唔到連食環署都睇好佢。小道消息透露，自由黨近日接獲食環署信件，指田北辰涉嫌喺九龍西違規掛街板，要求物主盡快清理，否則由該署出手，可能要收回費用。
公函寫「立會議員」
田二少向來奉公守法，如果街板有問題，當然要執番正佢，不過最搞笑嘅係，呢封公函竟然稱呼田二少做「立法會議員」，食環署咁畀面，田二少梗係識做啦，而呢封信，亦成為黨內近日美談。
講開又講，正常情況下食環署懶理街板問題，因此呢次事件，十分有可能係遭人篤背脊，至於誰人所為就眾說紛紜，事關田二少對手真係好多，但相信唔關已退黨嘅九龍城區議員黃以謙事。佢噚日話同自由黨再見亦是朋友，唔會反骨，就算鼠王芬拉攏佢都不為所動，唔介意幫田二少助選。
黃以謙雄心壯志想出選醫學界，但呢個界別強手林立，佢似乎終於睇清形勢知難而退，作出明智決定，噚日表示可能唔去馬。民建聯李慧琼獲曾鈺成讓位，應該篤定當選，噚日地區辦事處開幕，連財爺曾俊華都畀面到場。中聯辦九龍工作部部長林武既幫鼠王芬拉票，噚日又力讚李慧琼，真係面面俱圓。