落完雨，難得重見天日，屈咁耐係時候出郊外曬太陽，BBQ又點睇？郊外大把燒烤場選擇，為起條數分分鐘仲抵過自己買嘢食，唔使諗嘞，留番精力玩好過一袋二袋托嘢上山啦，一於上車蹺埋雙手等開餐，司機，燒烤場有落吖唔該。
記者：洪偉順、王震遠
攝影：伍慶泉、陳陶鈞
模特兒：BabyTang、Fion、Winne、Wendy@StageModels
燒乳豬$650
足9斤重，要拆骨、過水、炭火烤45分鐘，再近火爆豬皮，工序繁複。師傅一刀斬下去，肉汁四濺，聞落好香，真正皮脆肉滑。
即燒大乳豬
Familyday好去處，十枱着咗七枱客都係一家大細，「大尾篤燒烤王」大廚麥師傅話：「我鍾意見到咁有家庭溫暖嘅燒烤場面。」嘩，使唔使咁感性呀，「乜唔係呀？我由細到大都好鍾意BBQ，開燒烤場係我夢想，從一隻雞翼到一隻乳豬，我都會親自處理……」感性完畢，睇吓有乜好嘢食先，強力推介麥師傅即燒乳豬，左轉右轉拮爆脆豬皮，先過視覺癮，再斬件趁熱食，豬皮入口卜卜脆。
香草羊仔扒$64
用香草醃足一日，去除羶味，炭火再燒至全熟，鎖住肉汁，咬落肉汁四射，啖啖肉香。
燒鱔柳$76.8
秘製醬油搽鱔柳，唔醃直接燒，魚肉好快熟，無腥味無泥味，炭香四溢，小心辣親嘴。
有乜玩？
大埔汀角路汀角村斜對面/29482325
收費：三位以上開爐，星期一至五任食每位$58，其他日子每位$65，推介食物另外收費
海鮮任你揀
「大草原」真係有個大草原，負責人Jacky話：「我間場大到可以帶埋狗仔一齊BBQ。」附設200個免費車位，方便一家大細揸車蒲頭。擔凳圍爐燒，露天燒烤夠風味，唔抵得熱嘅，可以坐雅座，座位寬敞企理，有瓦遮蔭唔怕太陽曬，Jacky：「我堅持唔可以擺枱擺爐擺得太逼，一定要客人坐得鬆動舒服。」食物方面，主打海鮮，用料上乘唔係街邊貨，澳洲大扇貝、貴妃蚌、鮑魚、龍蝦好味到爆，抵撐。
日本岩手秋刀魚每條$20
夠厚身，有手板咁長，魚皮輕輕燒燶，香到九里遠都聞到，魚肉咬落夠鮮，正過唔少居酒屋。
龍蝦時價
生猛到痹，斬件直接炭燒，唔使加任何調味料，原汁原味最好味，入口超彈牙。須預訂。
貴妃蚌時價
邊燒邊出泡，齋望都Feel到蚌肉幾Juicy，炭燒添香味，無得頂。須預訂。
鮑魚時價
厚身有咬口，入口勁爽超多汁，唔好燒過熟呀，過熟變嚡就嘥嘢。須預訂。
澳洲大扇貝每隻$60
大大隻扇貝，睇到都食指大動，淋清酒燒吊出扇貝味，連食十隻都唔厭呀。
有乜玩？
大埔汀角路山寮路口對面/21452500
收費：一人開爐，燒烤包每位$70，不包海鮮
自己摘菇BBQ
「天水圍綠田園燒烤樂園」有溫室，大大束香口蘑菇同木耳都可以俾你親手採摘，再幫你用錫紙包好BBQ，新鮮健康，四隻字贏晒。負責人林小姐話：「啲菇生長過25日就可以採摘，師奶阿太，知道菇菌同木耳夠Fresh，就最鍾意攞嚟BBQ。」
香口蘑菇每包4両$20
加牛油同蒜茸調味，炭火焗完水份無流失，出奇多汁鮮甜，嫩嫩哋好好咬。
採集蘑菇，輕輕一拔就成束扯到出嚟。
木耳每包4両$20
唔同平時曬亁嘅木耳，爽脆度100分，落醬油超香口。
大大塊木耳，冲洗完可以燒烤食。
有乜玩？
天水圍沙江圍側天華路及天影路交界/24726848
收費：2位套餐$150，4位套餐$330，8位套餐$480