入到旺角DVD舖，老闆不停喊晒口話：「呢排好少新碟返喎！」其實唔係冇，只不過稱得上為鑽石卡士、大製作嘅電影，呢兩個禮拜真係好缺貨。臨星期尾，曙光終於初現，原來早排返咗美版Blu-ray嘅《公元前10,000年》，港版DVD也剛剛推出，老闆仲話，今集嘅CG鬼咁靚，唔講清楚仲以為長毛象翻生呀！
記者：陳國輝
原始生活逐格睇
1.現代細路仔好幸福，琴棋書畫乜都有；但原始時代嘅小朋友就認真慘，細細個就要被迫練槍、學打獵，目的只係為自己嘅族人捐軀。
2.現代人穿起一套迷彩衫，淨係知道自己好型；睇番原始人生活，佢一臉泥巴，呢啲唔係叫Fashion，實情係為咗捕捉野獸先咁做。
3.每個族人都係一個小社會，戲內亦出現3-4種不同族人，當大家遇上麻煩嗰陣，就會聚首一堂，搞個野火派對，可謂寓工作於娛樂。
4.追逐到沙漠盡頭，突然間，見到好多隻擁有紅色翅膀嘅巨型「飛鳥」喺海上暢泳，心裏面雖然驚，但明知族人就在眼前，點都要博！
5.估唔估到佢兩個做緊乜？查實在戲內佢哋正準備分手，臨別依依，當兩個好朋友要分別嗰陣，就會用呢種頭撞頭方式SayGoodbye！
6.見到有耕田用嘅石器工具，心裏立即好奇，仲拎上手左望望，右望望。梗係啦！佢哋一直喺高原地帶生活，邊有機會用到呢！
英雄救美式橋段
幻想吓自己係一個原始人，你會諗啲乜？當然唔會係炒股、買衫同Shopping啦！答案好簡單，係食物同女人。《公元前10,000年》得一條主線，男主角（史提芬史察特飾）之所以咁搏命去救人，咪就係為咗個女人（甘美拉貝爾飾）囉！英雄救美橋段，但109分鐘嘅過程卻遇上好多奇幻經歷，例如符符碌碌咁拮死隻巨型鴕鳥、猛獸劍齒虎竟然知恩圖報，最後並發現先進嘅失落文明……
過百長毛象超震撼
論卡士，男女主角唔算係荷李活一線明星，加上劇情發展單一，如果你諗住睇演技同劇本，未必係最佳選擇！不過，若然想感受一下原始世界係點，族人點樣生活，呢隻DVD應該幾啱嘴形。最正係有好多已絕迹嘅原始生物，會喺銀幕上重現，包括剛才提過嘅巨型鴕鳥以及劍齒虎；但講到最震撼，筆者必選長毛象空群而逃嗰幕，無論聲、畫一樣咁掂！唯一可惜香港仲未推出Blu-ray中文版，如果有機會睇到1080P高清畫面，相信有Discovery咁真實！
巨獸CG製作嚴謹
雖然DVD同VCD一樣跟單碟，但前者就附加BonusContent，包括導演及演員專訪片段、已刪減劇情、後期製作、自選結局，以及其他電影預告片等。不過第一和第二項幾乎每隻DVD都有，稍欠新意；反而值得留意，係自選結局同埋後期製作兩部份。尤其介紹到CG製作時，連戲中長毛象嘅走路和食嘢姿勢，全部模仿自大象而繪畫，可見製作人員係幾咁嚴謹同認真。
Profile
名稱：公元前10,000年
導演：羅倫艾默烈治
演員：史提芬史察特、甘美拉貝爾
片長：109分鐘
級別：IIA
查詢：華納影視（31281791）
