七月三日黃昏，中環人好唔得閒，因為《信報》慶祝創刊三十五年，在文華東方酒店舉行盛大酒會；機管局在港麗慶祝十周年紀念，兼且美國領事館在四季酒店招待貴賓，慶祝七月四日獨立日。達官貴人喺一個半小時內跑三場酒會，有乜辦法唔趕到氣喘，仲攞命嘅，是日黃昏快活谷有二○○七/○八年度馬季最後一場賽事（補賽），去馬場交通例牌擠塞。出席完酒會之後，趕去馬場，好容易錯過第一場。
政府高官亦好頭痛。機管局係政府機構，曾特首唔去唔得。曾先生與唐司長一齊為機管局酒會主持剪綵儀式，之後就去文華東方為《信報》酒會主禮，至於美國領事酒會？就由財政司司長曾俊華赴會做代表。相形之下，《信報》就特別有面子，因為曾特首、唐司長、黃司長與一眾局長到賀，認真係百忙之中，撥冗光臨，此外各黨派議員如走馬燈，團團轉，剛剛入場，轉吓眼就去咗另一個酒會咯。
左丁山到咗文華東方冇耐，就碰到馬會董事、大學校董會主席、立法會議員等，因為人太多，擠逼之下，且戰（飲白酒紅酒）且退，逼到入大堂中間之時，各人已搵定出口，一閃而去，有啲趕去馬場，有啲趕去四季，有啲要去港麗。左丁山亦然，行急步到遮打大廈樓下，主席Ｗ衝出嚟，即刻握吓手，主席Ｗ話：「啱啱落機，從機場趕返中環，𠵱家去《信報》酒會。喂喂，等陣入馬場，有乜好料？」香港人就係咁匆忙㗎嘞，放工之後更加忙碌。文華酒店康樂廳面積窄長，旁邊有好多出口，外面就係廚房外邊走廊，可通往門口，幾十年嚟到文華出席酒會之人，都知道呢條「秘密通道」，隨時鬆人；在其他酒店參加酒會，就冇咁方便咯。其實文華東方康樂廳並非辦酒會之最理想場所，但因為地處中環心臟地段，賓客步行可至，啲客人無論點忙，都可以走到嚟握手，逗留幾分鐘。如果七月三日其他報紙在灣仔君悅辦酒會，碰啱與機管局及美國領事撞正，是否同樣有咁嘅賓虛場面，事先好難預測。