中央要求香港撥款百億重建地震災區，煲呔速速安排議員去四川視察後再定奪，點知出發前，內地忽然唔發通行證畀長毛，理由十分荒謬，託詞指四川好多民眾及災民，對長毛講過一啲同賑災活動不相符嘅言論反應好大，所以有關部門唔畀長毛入蜀。
長毛雖然間中會抬棺材抗議，但行動激進唔代表佢不識分寸。5.12大地震後不出幾日，長毛係首個提出為死難者默哀嘅議員，喺國務院都未有任何表示前，長毛已經叫煲呔建議中央下半旗悼念，呢啲言行，究竟如何不符賑災活動呢？
怕長毛追究豆腐渣工程
有人指長毛準備去四川示威，傷害災民感情，長毛已講明唔會高嗌平反六四，但會要求追究豆腐渣工程，為無辜死傷學童討回公道，講呢啲說話都有錯？長毛去四川唔係搞事，只係做善事，對佢最有意見嘅怕且唔係民眾，而係擔心烏紗不保嘅幹部就真。
內地官員指民眾不滿長毛，係人都知大陸新聞封鎖，民眾又點知長毛講過乜呢？好多人聽到呢個藉口都笑，覺得真係搵嚟講。長毛噚日接受港台訪問時話，一度幻想呢次可獲發多次回鄉卡，事實證明佢好儍好天真，對於四川省政府拒絕佢到訪嘅所謂理由，佢話覺得匪夷所思。
長毛強調，從來冇講過到四川會提出要求平反六四、結束一黨專政，只會要求開放黨禁、報禁，因為咁先可杜絕貪污，保護人民，佢認為被拒入蜀嘅真正原因，係因為佢提出追究豆腐渣工程，有損高幹面子，佢又話收到風，有災民收聽自由亞洲電台報道，知道有香港議員會去四川訪問，想到成都請願，點知公安即刻搵人監視，𠵱家佢不能隨團，公安應該可以收工。
長毛被飛出訪問團條條fing留港，其他順利抵達四川嘅議員就俾災情嚇到儍，特別係去到震央映秀鎮阿壩鋁廠時，目睹滿目瘡痍大家都無言以對，每個議員都獲廠方送一樽震源石，呢樽石份量好輕，拿在手裏心頭卻千斤重。
此行人人都知唔輕鬆，噚日食午飯時，四餸一湯，白飯任裝，更有西瓜、香蕉做飯後果。四餸包括雲耳炒肉絲、薯仔炆肉丁、蕃茄煮魚、炒豆腐亁同綠豆湯，陳鑑林話估唔到咁好餸，相信解放軍平日食得冇咁豐富。