【本報訊】柴米油鹽日日加，其中電費更是家庭主要開支之一。從事電器工程30年的「節能大王」孫名林，將家居變作實驗場，想盡辦法節能省電，將家電用得最有效率，「燈照開，冷氣照嘆」，一個夏季可省下多達四成電費。孫名林決定公開節能大法，協助港人進行一場慳電大戰。 記者：蔡朗清
今年50歲的港九電器工程電業器材職工會技術總監孫名林，15歲入行做電工學徒，迄今摸清各種電器耗電量。他說，家庭電器用電量佔最重的是空調，達40%，其他依次是電燈約佔25%，雪櫃佔15%，「但係照明嘅耗電量過去10年升咗25%，升幅比冷氣機仲大。想慳電，一定要從電燈同冷氣機入手。」
慳電膽揀壽命較長
20年前家裏已裝上慳電膽的孫名林表示，全屋鎢絲燈換上慳電膽，電燈耗電量即減80%，但選錯慳電膽，慳電不成，支出反而增加，「因為慳電膽嘅價錢比鎢絲燈貴好多，平均60幾蚊一個，所以壽命最少要5,000小時先抵用，有啲得1,000至2,000小時慳電膽，根本唔慳電。」
他表示，選購8,000小時壽命慳電膽最慳電，燈泡每1瓦特（即Watt，俗稱火數）的流明（Lumen）光度越高，即效率越高最慳電。購買慳電膽不一定買名牌，但標籤一定列明使用小時、流明度等資料，「好似我最近喺屋企試用緊個大陸造嘅慳電膽，賣20幾蚊，壽命長達12,000小時，流明度有1,050，夠光又慳電。」
此外，選用慳電膽也要懂得使用技巧，「香港用燈都係偏光，其實可以漸進式減低光亮，例如10個燈頭減1個，就慳咗一成電費。我屋企原本用20火嘅燈，𠵱家全部換晒15火。」
冷氣機在夏天是最耗電的家庭電器，最省電必須選用一級能源標籤，「一級比三級慳電35%，比五級慳40%」，分體式冷氣機又較窗口式節能，「𠵱家分體式冷氣機已經平咗好多」。有部份市民習慣回家窗未打開便開冷氣機，強谷壓縮機十分耗電，若先開窗及開風扇5分鐘，再開冷氣，可省電5至10%，「同樣，瞓覺嗰陣，開着最細風力嘅風扇配合埋冷氣機，等壓縮機唔使長開。適當咁用冷氣機，可慳20至30%電費。」
三門雪櫃較雙門好
選購雪櫃同樣要選有一級能源標籤，三門又較雙門慳電，「雪櫃頂多八成滿，雪櫃門要關實，慳電10至20%。」
他表示，市民跟足其省電大法，整體電費可慳30至80%，「我住1,200呎單位，三房兩廳，用咗六部冷氣機、20多個燈頭，加上電腦、音響組合等，夏天每月電費約1,000元，慳咗三、四成。」
特稿：亁衣機耗電勁唔抵用
孫名林表示，眾多家電之中，最沒有必要使用、而又最耗電的電器，首推亁衣機，他絕對不主張使用，「我曾經用過一部亁衣機測試耗電量，部機開住2,000火嘅發熱線，以五公斤衣物計算，按指示分兩次亁衣，大約開個幾鐘頭，每日用，每個月電費60幾蚊。」此外，有部份家庭是採用電熱水爐，當中即熱式十分耗電，一般用電量達20,000火，長開一小時電費達20元，「有啲人冲凉長開花灑，咁樣冲凉好嘥，塗番梘時就應該閂花灑。」本報記者
