難得在一片盈警陰影之下，工行（1398）卻能排眾而出突然發盈喜，誠是大出市場意料以外。有散戶後悔前日工行「沽」聲震天之下未敢撈貨，坐失一次亂市中贏錢機會而扼腕不已。講真，撈底博反彈與feel到大市見頂走貨難度一樣高，亦好講彩數。
要捉正低位撈貨難比登天，炒開股票的散戶在大跌市中，若認為愛股跌至吸引水平，慣用小注資金作「投石問路」式入市，因無人知幾時見底，但起碼若然股海氣氛開始回暖，自己都有貨在手，然後待確認大市擺脫淡風後再加注。
升浪似告段落
港股終見回升，反彈181點，收報21423，惜成交僅500億左右，有人歸因美股國慶休市兼周末假期，未睇通就無謂大舉進攻。乜藉口都好，見到咁形勢，短線都未敢太樂觀。
中國高速傳動（658）剛以5.49億元人民幣，向從事特鋼業務的江蘇宏晟重工注資，以換取該公司逾50%股權，是次動作可令集團獲得穩定原料供應。消息應屬正面，但高速傳動日前升至16.20元創4個月高位後連挫3日，升浪或已暫告段落，宜靜待低吸機會，不必心急，建議等跌至12元水平才出手。