由導演嚴浩所執導嘅80年代電影《似水流年》，唔單止由梅艷芳唱嘅主題曲夠經典，其實電影本身亦都相當經典。當年呢部戲橫掃金像獎頒獎禮，兩位女主角斯琴高娃同顧美華威到盡，前者成為金像影后，後者就拎咗最佳新演員。雖然顧美華嘅實力毋庸置疑，奈何佢嘅產量少之又少，近年更加收埋自己，連人都唔見，前日記者發現到佢同老公喺中環逛超市，都算難得一見嘞！
顧美華雖然唔係大美人，但相當有氣質，年約56歲嘅佢素顏示人同樣清秀，而且佢早已榮升外婆，孫女都9歲大㖭啦。
前日下晝5點零鐘，打扮樸素嘅顧美華同老公AndyYen現身中環嘅ifc商場，拍拖逛city'super，甚少曝光嘅顧美華保養得幾好，言行舉止同以前一樣咁大方得體。
顧美華當時同老公先去睇紅酒，但睇完一輪未有幫襯，跟住行去麵包店買咗個麵包同一支飲品，由女方畀錢；繼而兩公婆邊行邊傾，去咗另一邊睇蛋糕同三文治，之後就去連卡佛繼續shopping。
再婚逾十年
其實顧美華早年離過婚，AndyYen係佢第二任丈夫，結婚至今都成十幾年，難怪畀人嘅感覺好老夫老妻，表現好有默契。顧美華由出道至今都係世外高人，有好演技但絕對唔濫拍，接拍嘅大多數係內地作品，04年佢仲憑《美麗上海》成為上海國際電影節金爵獎影后。話時話，斯琴高娃早排憑《姨媽的後現代生活》再做金像影后，唔知顧美華又會唔會技癢想出山呢？