常說減肥是女人的終身事業，近日有指與錢嘉樂秘密撻着的湯盈盈也跟時下女性沒兩樣，為了擁有一張標致的cameraface、為了穿衣好看，13年來用盡無數減肥笨招，食double份量減肥藥、喝菜湯、蘋果餐、紅蘿蔔餐等，暴瘦19磅但導致心跳加速、脾氣暴躁、失眠兼手震，健康全被拖垮。如今，眼前的湯盈盈化身拉丁舞女郎，身形結實，有賴勁舞舞走肥膏，曾演醜女「李笑好」的她悟出真理，有信心就會靚！ 撰文：朱倬誼
太多女人窮一生為減肥奮鬥，肥幾磅已大叫弊傢伙，十萬火急嚷着減肥，湯盈盈又何嘗不是？33歲的湯盈盈在加拿大出生，94年選蒙特利爾華姐摘冠，翌年來港選華姐後入行，雖然她是領正牌的鬥靚冠軍，也自以為好正，但港女時興瘦身，當年117磅的湯盈盈，無奈走上減肥不歸路，十多年來暴肥暴瘦，認真凄凉。
近年湯盈盈的體形比較穩定，原因是她跟隨鍾麗淇練高溫瑜伽，最近三個月又因參演無綫節目《舞動奇跡》學跳拉丁舞，豈料一跳上癮，身形越跳越弗，變得肌肉紮實。湯盈盈日前在銅鑼灣隨舞蹈老師周志坤練習拉丁舞，她接受訪問時說：「做高溫瑜伽會出好多汗排毒，開始時我一個禮拜做三、四次，每次做個半鐘，𠵱家我會加埋跳舞喼弗。」
「以為心臟病發」
湯盈盈續說：「我練咗拉丁舞三個月，肚腩瘦咗成吋，全身好多地方都瘦咗0.3至0.5吋，肌肉結實咗。跳拉丁舞可以收緊全身，令你識得控制肌肉，人都靈活啲。你要識點放輕自己個身，點用某啲肌肉去跳，我哋跳一、兩分鐘已經出晒汗，因為已經用晒全身嘅力，所以跳舞非常好，個人瘦咗都有力。」
湯盈盈的減肥史其實幾攞膽，話說她加入無綫時才雙十年華，babyfat未除，先是水土不服自然瘦，但適應後逐漸長肉，她又嫌肥，於是經人介紹看減肥醫生，結果搞出個大頭佛，她說：「個醫生教我食減肥藥食多啲，我食得太多，有次行行吓街，個心卜卜狂跳，我以為心臟病發呀！跟住都唔敢再睇嗰個醫生，亦唔敢再食減肥藥。嗰時食藥係會瘦，但仲會亁同瞓唔着，皮膚生粒粒，好口渴，食嘢又口淡淡，唔係咁想食。」
肥到面脹身脹
那是選美後一、兩年的事，由於湯盈盈屢被委派拍攝旅遊特輯，需常穿泳衣，為了苗條便出事，她嘆氣說：「瘦到凹晒呀，但唔係維持好耐，因為我好驚，身體好似好奇怪，得番98磅。當時食藥係覺得自己好肥，我喺加拿大時覺得自己好正㗎，117磅好OK，但香港女仔瘦，尤其我入呢行更加壓力大。不過經過咁多年，就算𠵱家有少少肥，我都會proudof呢樣嘢，我覺得女人有少少肉會好啲，有自信就會靚。」
98年，湯盈盈拍劇集《全院滿座》，變成全身肥肉滿座，體重直上高峯，腰圍接近30吋，她說：「嗰時同苑瓊丹、朱咪咪、關詠荷一齊拍，佢哋好鍾意食，咪咪姐餐餐買海鮮，叫canteen老闆煮嚟食，食完苑仔又請食糖水，跟住又消夜。我拍戲着嗰條褲，腰圍放咗成三、四次，肥到呢，成塊面係脹晒出嚟。」
眼見自己肥到爆，湯盈盈知死，到拍攝劇集《FM701》前又地獄式減肥，試盡無數減肥餐，齋飲菜湯或只吃蘋果度日，她說：「我試過食蘋果diet，由朝到晚都係食蘋果，話會瘦好多磅，後來都維持唔到，因為我真係鍾意食嘢。嗰時食啲減肥diet，我覺得唔好㗎，脾氣又差，手腳又凍，個人嘅system好亂。」為食令她放縱，到02年拍攝《十萬噸情緣》着泳衣拍戲，她好慘，又減。
「手掌真係橙色」
湯盈盈說：「嗰排係不停食紅蘿蔔，自己煮嘅菜湯、snack都係紅蘿蔔。有次我同張可頤拍拍吓嘢傾偈，我話呢排成日食紅蘿蔔，佢話食得多個人會變橙色，跟住大家比吓隻手，嘩！我手掌真係橙色㗎！佢對手就紅卜卜，之後我就停咗唔再食。」
過去十多年湯盈盈就是這樣時肥時瘦，這幾年她終於明白：「我係瘦極都有肉，我接受。其實一個人有信心就靚，呢樣嘢我唔知係咪喺阿好（《阿旺新傳》中的醜女李笑好角色）度學返嚟，人有時係要打扮，但都要心地好。你開心、healthy就得，唔一定要瘦到得排骨。」
心靈雞湯：修心收身同樣重要
洗滌心靈是另一種美，能由內弗到外當然最完美。湯盈盈愛咪書，並推介兩本認為值得細味的書籍，希望大家透過閱讀獲得新啓示。
《TheFivePeopleYouMeetInHeaven》
作者：MitchAlbom
「睇到我喊呀，會帶動你嘅情緒，但睇完之後冇咁怕死喎！呢本書係講每個人都有自己嘅價值。人與人之間有無形嘅聯繫，有啲人你唔識，但原來互相影響，要點樣lookback同珍惜你嘅人生價值。就好似一個女人做咗40年清潔女工，人哋覺得佢嘅生活好悶，其實佢有自己嘅丈夫、兒女、父母，佢喺工作同家庭上都有佢嘅價值一樣。」
《SkinnyBitch》
作者：RoryFreedman/KimBarnouin
「睇完呢本書，我唔係好想食肉，想試多啲齋舖。本書係講啲人點樣虐待動物，啲人幫啲動物打針令佢哋長肉、或者不停有奶，我哋食咗就等於食唔好嘅嘢落肚，內容係幾到point。本書有介紹用唔同方法食唔同嘢，包括睇標纖成份，教你朝早食生果，食嘅前同後半個鐘頭唔好食其他嘢，午餐就食多啲蔬菜。」
心水食肆
「我最叻跟人！」吓？湯盈盈說得理直氣壯。原來她是那種開餐自由人，人去邊佢去邊，自己從不拿定主意，但跟人開飯也跟出個美食天堂。她鋸扒嘆日菜不為奇，這鬼妹仔愛幫襯齋舖才有趣。
餐餐蔬菜瓜果
（功德林上海素食）
「腐皮卷Iloveit！好脆！」湯盈盈是蔬菜瓜果的癡心fans，無此不歡，齋菜正合她心意，腐皮卷和炒莧菜都是她的指定菜式。無綫總經理陳志雲跟她口味一致，都是功德林常客。
食和牛最安全
（原澗日本料理）
湯盈盈愛吃牛扒，又怕外國牛農在飼養過程中為牛隻注射藥物，所以只選吃日本牛扒，並推崇被譽為日式牛王的原澗日本料理，她說：「我會揀日本牛扒，因為日本會test晒啲牛嘅。」梁朝偉和劉嘉玲、黎明和樂基兒都愛幫襯原澗，此牛必定有料到。
至愛生蠔龍蝦
（香港洲際酒店TheSteakHouse）
TheSteakHouse是香港數一數二的五星級牛扒專門店，劉鑾雄和李嘉欣均是熟客，但湯盈盈更愛steak以外的選擇，沙律、龍蝦、鱸魚、生蠔、魚籽醬等，都是她的「賣飛佛」。
