湯盈盈和錢嘉樂近日被踢爆因參加無綫遊戲節目《獎門人》而撻着，向來工作拼搏的湯盈盈昨忽然請病假，缺席無綫新劇《疑情別戀》的宣傳活動暫避鋒頭；另一邊廂要開工拍劇的錢嘉樂雖然承認與湯盈盈投契，但又嘻皮笑臉指自己是「單拖哲郎」，反而田蕊妮一語道破，笑嘉樂好識揀：「個個女朋友身材都咁好！」
湯盈盈和錢嘉樂大鬧緋聞，有傳女方不時到嘉樂的匡湖居寓所過夜，昨日盈盈本應出席新劇《疑情別戀》在新蒲崗一射擊場舉行的宣傳活動，但她以生病為由甩底，記者致電她也未回覆。至於其緋聞男友錢嘉樂因要返電視城拍新劇《王老虎搶親》，無路可逃獨撐大局。
女友個個身材正
對於跟湯盈盈同居一事，嘉樂說：「唔係呀，我係『單拖哲郎』，其實同湯盈盈係朋友，佢同天明熟，朋友拉朋友咁樣。」湯盈盈上《獎門人》，錢嘉樂被指照顧有加，他則說：「我同個個都投契。」雖然是一名單身漢，錢嘉樂並不想傳緋聞，他說：「最好唔好喇！所有嘢都拍完劇先。」嘉樂拒絕緋聞，似念念不忘舊愛李珊珊，是否怕她誤會？他即面露尷尬說：「唔係呀。」
嘉樂經常取笑人，他和湯盈盈傳緋聞後即成箭靶，昨有份宣傳《疑》劇的田蕊妮便笑嘉樂道：「嘉樂仔真係好男人嚟㗎，仲好識揀㖭！個個女朋友身材都咁好，佢哋兩個都未結婚，拍拖都好正常啫，我都戥佢開心㗎！」
「連好朋友都呃」
同場的盈盈好友姚瑩瑩，直言日前大家才通過電話，當時盈盈仍稱感情空白，她說：「個死婆登台前打過電話畀我約食飯，但咁啱我又有朋友喺外國返嚟，所以推咗佢，但我都有問佢感情生活，佢仲話自己單身冇拍拖，我梗係信啦。」
瑩瑩表示活動後會傳短訊給盈盈，她笑說：「我會問吓佢係咪連好朋友都要講大話，如果真係呃我，我會好嬲同好失望！但係如果佢哋真係拍拖，我梗係戥佢高興啦。」
此外，瑩瑩透露與拍拖四年的圈外男友有感情危機，她說：「我好想有一個家，身邊嘅朋友又畀壓力我，但係男朋友話未ready，我唔知要等幾耐呀，我唔想到40歲先生BB囉，我男友仲開玩笑咁講叫我快啲搵另一個，搞到我都唔想同佢傾呢個話題。」
採訪：何慧斯、楊潔雯
攝影：陳順禎