1總潮流：<br>蝙蝠車　第一次

1總潮流：
蝙蝠車　第一次

Batman《TheDarkKnight》即將上映，令人期待的是HeathLedger演的小丑，那臉上的邪氣雖恐怖，但總覺得比上幾代小丑多幾分帥氣，有種難以形容的吸引。隨Heath離世成為他的遺作，焦點當然落在精神分裂的小丑之上。但對於玩具迷、fans而言，今次焦點卻係有半張寫字枱咁大的蝙蝠車，第一次出給12吋Batman享用的座駕，連同蝙蝠俠Tee及玩具產品，要買晒都未必有錢剩買飛入場。身為Batman迷的羅仲謙（四葉草飾演阿謙）大談由細到大對Batman的感覺，會睇戲愛買衫卻少儲玩具的他，都忍唔住大叫：「Batman車好型呀！佢等咗咁多年，終於有車揸喇！」

記者：劉明慧
攝影：周旭文、譚盈傑（劇照由華納提供）
Hair:JanChiu@SalonBIS

12吋Batman的座駕第一次

電影人物figure一向係fans大灑金錢的重點，美國Mattel於5月時已推出一批Batman玩具，小丑尤其受歡迎，ebay更炒高至60大元美金。不過其膠公仔始終不夠完美，所以在眾多Batman玩具入面，最引人注目的不得不提HotToys自家出品的蝙蝠車及12吋figure。向華納買下版權，請來韓國造型師Yulli及KimJungMi，為Batman及小丑雕刻面容，像真度極高，拍玩具照猶如拍劇照一樣。討論區早已有不少討論，但話題就放在兩架1/6的蝙蝠車之上，全因首次有如此巨型蝙蝠車可以放得落12吋大的BatmanFigure。手工細緻，連開門都跟足原著，的確是fans的一大喜訊，但同時亦是fans與荷包大戰的開始。

■1/6TheDarkKnightBatman（Original版）$930/c（7月中上架）

■1/6TheDarkKnightBat-Pod$1,500/c（11月上架）

■1/6TheDarkKnightBatmobile戰車$2,800/c（11月上架）

■Batmobile可以打開蓋，又可以着燈，仿真度極高。

■打開蓋之後，座位對面的控制板可以移動，將Batman放進座位之內。

■TheDarkKnight12吋小丑$930/c（7月中上架）

■小丑衫全部可以更換，脫掉大衣就是背心恤衫look，拿起小刀，加上招牌笑容，有如真人一樣。

■小丑配件包括有4款手、小刀、14隻啤牌及小丑圖樣的美金一叠，小刀連伸縮效果都做埋。

■TheDarkKnight12吋Batman（TheDarkKnight版）$950/c（8月上架）

■Original版的Batman的盔甲沒有新版這麼多紋理，長身頭盔只可坐大車，只有新版才可坐電單車。

■新舊版Batman配件都各有3對手、飛鏢、手槍等，Original版有攀爬架的手，而新版就配有騎電單車的手。

■新舊兩款Batman都可以換頭，左邊眼神較認真的是TheDarkKnight版，右邊是Original版。

好羨慕一個咁完美的男人

阿Him（H）
Apple（A）

A：Batman電影中，最喜歡那個男星演繹的Batman？歷代Batman造型，又最喜歡那一個？

H：佐治古尼做的Batman都幾有型，而且嗰集仲有埋羅賓，都幾好睇。Batman造型最吸引係基斯頓演繹的那一代，佢套盔甲好型，加上基斯頓的身形同線條夠靚，變身做蝙蝠俠之後特別好睇。而舊Batman造型，好似以前電視劇集嗰款，就唔多鍾意，就咁一塊灰色布，感覺好兒戲。

A：Batman電影中，最喜歡那個男星演繹的小丑？

H：我就鍾意積尼高遜做的小丑，本身佢個樣都有少少奸，扮小丑演得好有說服力。新一輯的希思都扮得幾恐怖，佢邪惡形象同Batman可以做到好強烈對比，不過可能細個時的情意結，始終覺得積尼高遜最好，印象亦最深刻，細個睇一次驚一次。

A：在眾多美國漫畫英雄中，為何對蝙蝠特別鍾愛？

H：其實蝙蝠俠係咁多人物入面最特別的一個，好似超人同蜘蛛俠，佢哋本身都有超能力，但蝙蝠俠只係一個普通人，佢係靠科技及自己的力量去打壞人，加埋有錢又靚仔、身手又好，一個咁完美的英雄，真係好令人羨慕。

熱搶電影主題Tee

《TheDarkKnight》的Batman將會對付故事中最經典的小丑，形象突出的小丑雖是奸角，但一直深受Batman迷所喜愛，而今季izzue及FCUK都不約而同以兩位主角成為crossover系列的圖案，把二人活現於整個系列中，izzue用上剪影效果演繹，而FCUK就係原著漫畫插圖tee，看來電影迷都有排難以取捨。

izzue.com×Batman系列：