上周日中區花園道發生嘅嚴重車禍，一部旅遊巴懷疑制動系統失靈，落斜時連撞8部車後，再撞向政府總部大樓外牆先停低，意外令一名13歲女中學生命喪輪下，令大家關注起旅遊巴安全問題；所有車輛都要經過運輸署嚴格嘅驗車程序，合格後先至可以喺道路上行駛，所以大家毋須過份擔心，至於好似巴士咁嘅重型車輛，制動系統操作原理同私家車有啲唔同，就係佢會透過儲於風缸內嘅壓縮氣嚟推動制動鼓，而唔係單靠油壓。
常留意壓縮氣存量
據大昌行技術部湯國基指出，旅遊巴士喺行車期間，車輛本身會自行「叉風」而令風缸內嘅壓縮氣存量足夠，「但駕駛者應該時刻留意錶板上嘅風缸壓縮氣存量錶，倘若過低系統會發出警告，駕駛者並應當立刻停車，同時亦應該喺開車前測試制動系統係咪運作正常，並應定期檢查煞車皮、迫力喉及接駁風缸嘅喉管，免得因『漏風』而令制動系統失效。另外，落斜時更應緊記要以低波行車及盡量使用廢氣煞車，同埋唔好踩死Brake，以減少因過熱而失效嘅機會。」
記者：丹尼斯
