-10℃防寒　雪敷冰機

這幾天簡直熱死人！走出街一會即汗流浹背，最想梗係走去冰天雪地降溫消暑。暑假又嚟喇，Pentax就專為避暑人士推出一部OptioW60數碼相機，最強就係可以喺-10℃低溫環境下操作。加上機身防水防塵，咁即係拎去亞熱帶拍水着消暑又得，去南半球滑雪影相都得，得咗！

記者：許福合
攝影：陳陶鈞
Model：Fion

看不出可以防水

防水功能對數碼相機並非首創，而W60特別之處係「看不出可以防水」！事關以往自稱可以防水的相機，外形一般都好架勢，通常加上厚膠圍邊與別不同，基本上睇個樣就知可以防水。W60與普通相機外形接近，雖然未能叫做卡片咁薄，但放落褲袋絕對無問題。據廠方資料，W60可以在水下4米連續用2小時，而同系列以往只能處於水深3米，其防水能力達到最高的JIS8級（即可以限定水深潛水）；加上設計成可以在-10℃環境下使用，雪地都可以又影又拍，真正破格。W60同時又兼備防塵能力，達JIS5級，操作可不受塵粒影響，幾粗用都不用擔心。

■防水機中都算輕細，輕鬆入袋。

■要在水中拍攝，記得轉用水中模式，效果更佳。

■眨眼Re-take可以從Menu內選擇開關。

0.03秒
認32張人臉

相機最怕失焦，影人更怕影到「不似人形」，所以人臉對焦已成為數碼相機必備功能之一。W60當然不會例外，而且大幅提升速度及數量，只需0.03秒即可以認出32張人臉，比一般相機只認到10張臉相差幾倍，速度更加贏一條街！對焦同時，相機會同時設定自動曝光，快拍相片都可以好有水準。另外，W60更加入SONY勁谷的一笑即拍功能，保證相中人笑得開心。此外亦附加一個眨眼提示功能，可在拍攝之後檢查到人物是否眨眼並即時補拍。咁以後影完相想補多張，唔使出聲即可Re-take！

■一次過認到32張臉，使用畫框也可人臉對焦。

■按下人臉鍵即可控制人臉對焦功能。

水底高清拍片

其實W60既然有防水設計，自然不會只限影相咁簡單，攝錄影片亦係佢另一強項！其影片質素可以達1,280×720（15fps）及640×480（30fps），拍攝中途可利用防震功能令到影片減低晃動。而落到水，W60亦一樣可以攝錄，用家可以因應水底環境使用水中攝錄模式，影片就會因應水底進行優化。W60在拍攝中途，鏡頭不會伸出機身之外，但已具備5倍光學變焦，且有28mm廣角，拍攝靈活性相當不俗，尤其在水中拍攝，鏡頭變焦就更重要。W60防震功能適用於相片及影片模式，加上高達ISO6400感光度，亦有助夜景及水下拍攝。