校友會午餐會吸引好多人參加，最老一位喺一九六一年畢業，最年輕嘅係二○○七年畢業生，兩者相差四十六年，幾乎係阿爺與阿孫同枱食飯。彼此年紀相差咁遠，社會地位亦相距甚大，如果唔係有校友會呢個「中介機構」，佢哋好難有機會認識以及坐得埋。年輕人參加校友會就有呢個好處，諗得通嘅，能夠認識好多人，拓展人脈網絡。三十四歲嘅副局長十三年前一畢業，就識得自己報名參加校友會午餐，唔使師兄師姐介紹。
公關W與高考狀元製造廠恒生商學院有若干關係，大家一齊恭喜佢，公關W話校長叻啫，與佢完全無關，只係與有榮焉。狀元製造廠於今年高考取得五百一十五個A，佔全港百分之二十三，並且包括兩位6A、六位5A生，將其他學校拋到離行離列，成績嚇人。公關W話校長與教師學生打成一片，與學生一齊游水，向教師派花紅，請全體老師到上海旅行，用嘅係經濟理論方法。校長到職之時係歐肇基當政，之後由讀經濟學出身嘅鄭海泉掌權，兼恒商校董會主席，現任揸弗人柯清輝又係讀經濟嘅，有佢哋兩位先後在校董會支持校長嘅開放政策，校長施政自然得心應手。
之不過，到咗二○○九年，恒商就會收埋最後一屆高考生，二○一○年冇新生咯喎，以後點搞？辦社區學院，然後轉型到私立大學？還是直接演變成為私立大學？照計恒商擁資甚巨、後台夠硬，兼且世界上有不少博士搵工（雖則商學院教授特別吃香），以恒商之財力及不受政府薪酬制度影響，效法哈佛哥倫比亞大學嘅話，而向其他大學高薪挖角，隨時可以啦，做為小型商社大學，毫無困難。
睇吓嗰啲高考6A、5A狀元嘅入大學志願，全部都話到港大或科大讀商科加法律或環球商業，點解冇人話要入中大嘅呢？中大環球商業科水皮啲咩？一位在中大教書嘅朋友解釋，現在中大環球商業科學生一個學期在哥本哈根、一個學期在北卡羅連納州ChapelHill，一個學期在香港上課，其他三個學期在本校上堂，每班四十五人，中大生只佔三分一，即係十五個名額，因名額少，中五會考尖子爭住申請，係好難入嘅。