超級射手大黑將志返嚟喇！大黑唔再眷戀歐洲，決定離開拖連奴，重返祖家加盟東京綠茵，希望得到日本國民認同，重新入選國家隊。
大黑將志人氣雖然唔及中村俊輔同中田英壽，但都深受球迷歡迎，佢99年於大阪飛腳出道，01年轉投當時日乙球隊札幌岡薩多。身高1米78，體重73公斤，大黑身材唔算魁梧，好多教練搵佢踢進攻中場，但佢唔多鍾意，重返飛腳後叫教頭西朗野最緊要搵佢踢前鋒，佢04年射入20球，成為日聯2號神射手，真係有料到！
大黑將志喺國家隊亦有佳作，05年初入選日本國家隊，喺世界盃外圍賽面對北韓，完場前射入關鍵「士哥」，做咗國家英雄，獲球迷稱為「大黑樣」，當佢神咁拜。同年洲際國家盃，佢對住巴西入球靚波追和，進一步奠定國家隊地位。
轉投拖連奴長坐冷板
不過，大黑生野心勃勃，05年季尾決定挑戰歐洲，首站去咗法乙格勒諾布爾，05至06球季踢19場入6球，之後加盟拖連奴後坐多過踢，落場10次全部食白果！球會經常換帥，但冇人肯用大黑，令呢位射手王變咗冷板王。
06年世界盃後，大黑將志被國家隊拋棄，佢同拖連奴約滿後，唔少意大利同歐洲球會斟佢，但大黑最終選擇重返東京綠茵。大黑表示：「首先我要搵番對射門鞋，踢番3年前嘅水準，我仲想重返國家隊，參與2010年世界盃！」大黑級數唔使懷疑，最驚佢坐足兩年冷板狀態唔掂，佢近期已狂操，希望回復至「弗」身形，日本國家隊前鋒近期冇乜料到，大家都好期待佢再現光芒！
作者簡介：2001年開始擔任足球賽事自由撰稿人，曾親身採訪各項大賽，包括世界盃、亞洲盃及非洲國家盃等。現為香港賽馬會足智彩網頁撰寫球評分析。