因拍劇而撻着的鄧健泓和李詩韻，雖然曾經多次被拍下出雙入對的照片，不過他們堅持否認戀情，關係撲朔迷離，二人昨日在劇集《老婆大人II》開鏡拜神儀式上，再被追問關係，鄧健泓在群眾壓力下，半推半就地承認戀情，在旁的李詩韻更開心到拍手附和。
陳錦鴻、宣萱、鄧健泓和李詩韻昨日在炎熱天氣下，分別着上西式和中式的禮服，在電視廣播城的教堂場地為劇集《老婆大人II》開鏡拜神，陳錦鴻和宣萱這對假情侶認真默契十足，一步入教堂有如糖黐豆一樣又攬又錫，反而鄧健泓和李詩韻這對真情侶則顯得相當避忌。
對於有報道指鄧健泓和李詩韻同居不同車，堅稱是好朋友關係的鄧健泓和李詩韻忽然出奇地合拍，一唱一和地說：「我哋咁啱住喺同一區，而且仲係咁啱得咁蹺俾人影到，呢個世界真係好多巧合，我哋成日都俾人跟，都習慣晒啦！總之在公在私我都當詩韻係好朋友，亦覺得佢係好女仔。」李詩韻也附和說：「啲報道仲話我因冇公開關係而唔開心，根本我都冇咁講過，我同佢係好朋友。」
公開關係開心拍手
問到鄧健泓是否受公司壓力而要低調戀情，他笑說：「我哋都合作拍埋結婚場面喎，我只係覺得有好多嘢唔需要同人講咁多，大家心照咪得囉，如果我將來結婚嘅話，一定會話畀大家知，唔會靜靜搞掂。」鄧健泓再被追問打算幾時公開「正印女友」的身份，他敵不過群眾壓力，只好唯唯諾諾地說：「總之大家意會到係乜嘢就係乜嘢啦！」在旁的李詩韻聽到終被確認關係，隨即甜笑地拍手。
「鍾意雪姑七友」
此外，鄧健泓和李詩韻在劇中會有一場夢幻婚禮，他說：「嗰場結婚戲響廸士尼入面拍，當時仲有米奇米妮好多superstar一齊拍，真係好開心同難忘。」最開心係咪同詩韻一齊拍？「咁佢開心啲，因為有佢最鍾意嘅雪姑七友。」
宣萱透露拍完《老》劇後，接着又會接拍《施公奇案II》，她說：「本來我諗住唞暑，不過Bobby（歐陽震華）打電話問我有冇興趣再合作，所以今次可以話因為佢嘅關係而接拍。」
採訪：何慧斯
攝影：黃偉雄
