小藍早前砌咗部膽機，單係聽CD啲聲都好正，近日膽粗粗買個唱盤返嚟，試吓膽機配黑膠唱片嘅滋味，重投聽黑膠嘅懷抱。但係巿面唔係咁多新版黑膠碟賣，都係聽番以前剩低嘅，好彩識到情迷黑膠碟30幾年的發燒友羅檳倫，搵佢求救兼且分享經驗。
40幾歲嘅羅檳倫話，黑膠唱片嘅聲音同數碼化嘅CD碟好唔同，啲聲聽嚟有彈彈吓嘅感覺，而去到最高境界，可以話「穿牆過壁」。另一個特點係可以體會到唔同年代嘅唱片嘅特殊味道，「唔同年代嘅黑膠錄音效果都好唔同，可以聽到唔同嘅味道，重拾當年社會變遷嘅感覺。真係唔止聽歌咁簡單。」
復刻版效果唔及當年
羅檳倫話，自己聽歌好雜，除聽本地流行曲，也有外國交響曲。但係𠵱家復刻版黑膠唱片唔多，加上復刻版嘅錄音唔及當年，所以要周圍搵二手黑膠碟。佢發現九龍灣工廠區有一間樓上舖，叫做經典音響唱片公司，係賣外國二手黑膠，種類好鬼齊，經常去搵心頭好。早幾日，羅檳倫帶小藍上去見識見識。
經典音響嘅老闆娘余敏瑩話，近年真係多咗人聽黑膠，當中唔少係年輕人㖭，想聽吓黑膠同CD音質嘅分別。老闆娘話，佢哋主要賣外國嘅黑膠，部份保存得好嘅黑膠，可以炒幾千蚊一張，好似意大利作曲家羅西尼（1792-1868）嘅6首奏鳴曲，𠵱家賣到4,900蚊，舊年一張同名全新未開封嘅黑膠，仲賣到1萬蚊㖭。