連日落大雨，半年降雨量，打破一百二十四年紀錄，今年不愁水塘冇水啦，求求天公，落雨落夠嘞，唔好再落住。
人心無厭足，天旱之時望甘霖下降，近乎水災之時就望天天放晴。今年通脹已夠特首煩，市民煩，加上天雨連綿大雨阻礙GDP增長，滯脹局面漸成，香港真係要神仙打救至得。呢日到機場接機，回程時過咗東涌，真正望到山坡上有三四條泥坑，因表面青草及山泥下瀉而形成，大雨時容易變成下水道，繼續衝擊周邊泥土，十分危險。唔怪得前一輪有黑雨之時，啲泥水不斷冲落馬路，癱瘓咗機場往來交通。
即刻打電話畀惡佬明問：「喂，你哋建築界幾時可以重修大嶼山山坡呀？」惡佬明因為天下大雨，無法開工，比較得閒。惡佬明話：「大嶼山山坡關我乜事，你問路政署，路政署會問馬路及山坡維修承建商，承建商就會問天公幾時可以放晴，等佢可以搵工人開工，工人就會問佢哋上山開工，生命有無危險，材料點樣運上山，人有問題，未有答案之前，山坡仍會保持現有狀況。」
估唔到一條問題會引起一連串問題。施工程序原來不簡單，有乜辦法呢？惡佬明繼續講：「唔係冇，第一，一定要天晴至可以講開工，仲要施工期間，連續幾十日冇雨落，否則今日開工，聽日落大雨嘅話，石屎未亁都冲走咗啦。第二，無錢不行，運材料石屎上山，最好用直升機，好貴㗎，但不可不知，大嶼山山坡上有高空電纜，直升機好棹忌，直升機公司有錢都未必肯接呢單生意。」冇直升機幫手，點做呀？
唉吔，怎麼辦？惡佬明人在九龍地盤，正為工程阻慢而發愁，不能如期完工嘅話，法律問題隨之而嚟，佢哋係私人建築公司對私人地產公司，有糾紛唔會公諸於世，少咗一層社會壓力，但大嶼山山坡係公共工程，區議員立法會議員吼到實，做得慢啲有可能波及特首民望㖭。惡佬明話：「所以我哋公司唔敢接政府工程，費事畀政府官員同我哋講社會責任唔講銀呀！」