倒數緊喺政府日子嘅肥馬局長,早幾日宣佈辭職時臨別吐真言,寸爆親疏有別嘅煲呔做不到政通人和,正所謂忠言逆耳,肥馬政治手腕圓滑食慣四方飯,就算劈炮都不能夠得罪人,噚日趁商台長壽廣播劇《十八樓C座》邀請佢去周記茶餐廳嘆咖啡時,把握機會交心表態,改口大讚煲呔係好特首、好上司,講到好似想收番辭職信留低咁滯。
有成40年歷史嘅周記茶餐廳,風雨不改陪伴幾代香港人成長,周老闆、拉表叔同三姑等角色,直情好似聽眾街坊咁,為慶祝開業40周年,周記噚日請肥馬局長客串一集,不過佢唔使扮其他角色,做番自己就得。
高官被指屁股指揮腦袋,在位時少講人話,離開官場後先暢所欲言,好似陳太、王永平同葉劉咁,都係近年批評政府施政問題嘅重炮手,一開聲就烽煙四起火藥味勁濃,肥馬日前忍唔住寸煲呔政府政不通、人不和,八方有理由相信佢事後可能有壓力,否則噚日飲過周記杯金牌咖啡後,唔會改口大擦煲呔對鞋。
肥馬噚日去到周記同周老闆吹水時,被問到對上司煲呔有乜評價,肥馬呷啖咖啡,施施然咁話唔方便公開評論老闆,不過,佢實際意思係話唔方便公開評論老闆嘅缺點,優點絕對唔怕講。肥馬下星期先開始離職前休假,𠵱家仲收緊政府人工,當然唔會唱衰老闆,佢話煲呔係一個好老細,係一個好盡心服務市民嘅領導人,至於親疏有別、政不通、人不和呢啲唔啱聽嘅說話,佢隻字不提,仲亁淨過擦黑板啲粉筆字。
最鍾意食亁炒牛河
飲完周記金牌咖啡後,肥馬前言後語咁大分別,究竟呢杯咖啡有乜秘方呢?如果高官飲完周記咖啡後都咁識講嘢,煲呔可能要日日打電話去周記叫外賣,送一百幾十杯去政府總部,咁就唔怕高官失言令佢尷尬啦。
自言平時鍾意去茶檔嘆茶嘅肥馬,噚日透露自爆最鍾意食茶餐廳亁炒牛河,貪佢味濃香口,唔怪得食到佢有個大肚腩,不過自從得悉患咗腦動靜脈血管畸形症後,肥馬話飲食要好小心,多油兼卡路里極高嘅亁炒牛河掂吓都唔得,不過佢話會繼續幫襯茶餐廳,「唔食亁炒牛河,可以食其他嘢嘅。」mailto:[email protected]