想玩原音靚聲？當然由壓製音樂檔案開始，揀完MP3機，講到最尾能令你洗耳恭聽者，都係一副能逼出原音十二成功力嘅耳筒。須知呢類發燒耳筒，等閒價位過千！由於係非常「私人」物品，基本上所有舖頭都冇得試！想知邊隻最好聲、最啱聽，時下最Top耳筒，放晒喺度任你揀！
記者：朱崇德
攝影：周旭文、譚盈傑
平均性強百搭耳筒
講到SHURE，唔玩耳筒嘅人都知佢係耳筒中之貴族！而SE530可算係品牌中旗艦之作，主Sell係分析力細緻，雖然高低伸展度唔算係最闊一隻，但中高表現感覺舒服，而中低爆炸力都算幾強。由於佢較中性Setting，所以各方面表現平均，對不同音樂種類適應性特別強。
分析力最強膽AMP音效
一般靜電耳筒電壓需求會較高，多數係家用Hi-Fi專玩，但STAXSR-001MK2就係少見Portable式設計。以靜電變換達致極細微調節的震動，論分析能力，大膽講市面冇一隻傳統耳筒能夠比擬，用嚟聽Jazz同Classic一類輕音樂同抒情嘢，簡直有晒膽AMP嗰種感染力。相對高、低音表現爆炸力反而爭啲，不過道理係「相信冇人用部膽AMP嚟爆套《雷霆救兵》啩？」，所以Pop嘢可以免問！
高中低三路音效調節
如果閣下聽音樂舊至古典、爆至HeavyMetal都係你嘅至愛，PioneerSE-CLX9同你一樣都係一種另類選擇。跟機有六組「耳筒管道」調節，分別為高、中、低三路音效，作高低二級突出性調節，最適合多元化音樂達人。
三單元低厚靚聲
UE可謂近年甚得香港發燒友喜愛品牌，而呢隻10Pro亦係當中旗艦作。玩三路分音，高中低表現細緻，高音表現感覺同SE530相近，但低音感覺仲潛得深啲！音色都係玩平衡多元化，Pop、Classic都相當聽得吓，最重要係價位合理，相對某啲牌子，仲唔會有玩一年要入廠換線嘅煩惱。
硬碟MP3機玩最靚聲
日版VictorHP-S900，論外形有少少當年「蛋」嘅影子。整體高低音伸展度較強，高音達中上，而低音表現仲量感非常重，好明顯有日系血統影子！不過相對音源電壓要求會高啲，普通MP3機仔好難推得佢起，較適用於Discman玩家或HDD型MP3機使用。
工業耳塞級最強隔音
如果你經常搭巴士、地鐵呢類多人嘈雜環境，ER-4S係你聽歌必備！事關佢幾乎有工業用耳塞嘅隔音效果，Sales話畀記者知，零距離對住風炮掘地，都唔會影響到你聽歌。ER-4S較重高音表現，攜住嚟行街，一定要小心過馬路。
唔過千玩靚重低音
論性價比，CREATIVEAURVANADJ可以話最強！$798幾及發燒級，高低音表現都算平衡，但走偏日系路線，重低音會重手啲，但分析能力都算OK強。最正係佢專為流動式設計，普通MP3機仔唔加流動AMP情況都有十二成狀態，勁抵玩！
平玩靚耳筒
入門玩家UE首選
想玩UE？又想平啲？好多醒目客首選係呢隻5仔！玩二路單元，高低音伸展力同分析力屬中上，而且價位平成千，係好多入門級玩家之選。
入門耳筒靚聲平霸
SENNHEISER都算係耳筒界名牌，而呢隻MX360更係好多入門玩家首選！事關喺300蚊內入門耳筒級別，論分析力、音色，基本冇耳筒靚得過佢，要$500開外先有明顯差別。想平玩就要認住佢！
耳筒AMP校大聲
有啲舊款MP3機，可能由於音源訊號太弱，當配隻耳筒時，有時會覺得推極都唔起、冇乜聲！其實市面有種手提式耳筒放大器，佢可以幫你增強訊號，最高可達600ohm，差唔多屋企用緊嗰隻Hi-Fi耳筒，都可以經佢隊埋入MP3機用！
店舖資料
a.中原電器（25063838）
銅鑼灣時代廣場9樓911號舖
b.AV2000（23325598）
旺角奶路臣街6E德發商場地庫16號舖
c.英京影音（23915331）
旺角西洋菜街51號友誠商業中心8樓