雖然2008歐洲國家盃已經告一段落，西班牙以一比○贏咗德國，但網民一直狂轟陳百祥（阿叻）。喺無綫直播賽事時表現唔專業。今個星期一凌晨時分上演歐國盃決賽，一向撐荷蘭反德國嘅阿叻擔任無綫直播嘉賓主持，佢喺節目度唔單止頻頻狂踩德國隊，言語間仲冷嘲熱諷，講埋啲帶侮辱性說話，例如唔止一次講「德國球員好似俾人舞馬騮咁」，令到好多球迷觀眾極度反感，除咗無綫同本報接獲唔少有關阿叻嘅投訴外，廣管局接到嘅投訴仲由前日兩宗增到噚日嘅12宗，投訴內容係主持言語不當。對於觀眾同網民對阿叻嘅投訴，無綫體育組監製李漢源話：「我哋會接受觀眾意見反映，提番嘉賓言論唔好咁激。」
教練要孭鑊
身為德國隊擁躉嘅林尚義（阿叔），當晚亦有㩒去無綫同now兩邊睇直播，對於阿叻喺節目度狂踩德國隊，阿叔噚日都忍唔住喺電話度話：「唔應該咁做，身為一個主持應該中立，不過算啦，佢都唔係做開嗰瓣！」講到德國隊當晚表現，阿叔指打得好差：「德國嗰晚係打得渣！波歷克都未好番晒，做乜重要佢出嚟，後尾佢打到爆晒缸仲唔換佢出嚟！我覺得個教練要負好大責任囉。」