馬國明和徐子珊在劇集《甜言蜜語》中飾演由朋友演變成情侶，曾五度合作的兩人已經試盡不同關係，不過難得遇上合拍對手，所以二人不抗拒第六度合作，馬國明更坦言希望做徐子珊的後父，並且要財色兼收。
最近為宣傳無綫劇集《甜言蜜語》，兩位主角馬國明和徐子珊都不敢怠慢，日前二人雙雙接受訪問時，談起戀愛中的重要元素──甜言蜜語，身為男士的馬國明自言實際，但未試過被女友投訴不夠浪漫，他甚至想將來結婚省卻一切繁文縟節，閃電出走到另一地方完成人生大事。
未遇浪漫男士
子珊則說：「我唔算係一個浪漫嘅人，而且我覺得浪漫、甜言蜜語呢啲嘢應該係男士負責，個個女仔都鍾意另一半識得製造驚喜，所以我會好欣賞呢啲識得製造驚喜嘅男士，可惜我到𠵱家都未遇到。」
雖然馬國明口口聲聲說行事實際，但原來他骨子裏相當鬼馬，當他與子珊拍照時，馬國明竟主動營造浪漫氣氛，共晉大餐，令在場其他人士差點誤當電燈膽。
事後馬國明說：「子珊係我喺TVB入面合作拍劇最多次嘅女藝人，所以默契就係咁培養出嚟。」
演奸角求發揮
馬國明更表示與子珊先後演繹過不同關係，包括情侶、兄妹、敵人及夫妻等，所以下一次再合作時希望有突破，他笑說：「我覺得最好係做父女，仲要係後父嗰種喎，而且仲要財色兼收㖭！
馬國明續說：「其實我好想做奸角，同公司反映過好多次，做奸角真係好好玩同埋好有發揮空間，雖然觀眾未必鍾意睇我做奸，但係我都好想有機會滿足吓自己。」
採訪：何慧斯 攝影：葉君海
服裝提供：MISSSIXTY
化妝：OmixB（徐）、MargaretWongofBeautyTech（馬）
髮型：AsonWongofHAIR（徐）、WenofHAIR（馬）
場地提供：LaBrasserie（GatewayHotel）