曼聯領隊費格遜兩日前放完一個長假後，即刻面對一個難題，而且都係同葡萄牙有關──就係點樣挽留副手基羅斯同埋響晒鑼鼓話要走嘅基斯坦奴朗拿度（C朗），認真濕滯。
C朗未必返曼聯報到
費爵爺剛啱喺法國返到英國，而呢個可能係佢人生其中一個最開心嘅假期，梗係啦！帶領紅魔勇奪「雙料冠軍」，到家陣可能仲回味緊。但開心嘅時間過得特別快，一歸隊，先係要決定點處置「叛將」C朗。西班牙方面傳嚟消息，C朗原定喺7月10號返曼徹斯特向球會報到，但佢堅決加盟皇家馬德里，同個身材激凸嘅妮莉達去完意大利薩丁島後，已轉飛邁阿密，繼續過一個火辣假期。7月10號？隨時影到冇，真係費Sir你有你忙碌，C朗繼續風流快活。
基羅斯或執教葡萄牙
C朗呢筆講得太多，不如講吓基羅斯，盛傳葡萄牙足總打算搵佢執教，接替加盟車路士嘅「大菲」史高拉利，能夠教自己國家嘅國家隊，話基羅斯唔心動就勢係假。佢近年同費Sir拍住上如魚得水，幫對方解決好多場內或場外問題，地位舉足輕重。
假如你問費Sir，呢個助教嘅重要性未必低得過C朗。話說03-04年球季，當時基羅斯俾皇家馬德里撬咗去教波，而嗰季曼聯最後只得第3名，打爛之前費Sir喺英超教曼聯非冠即亞嘅齋缽。所以話，如果冇咗呢隻唔知係左手抑或右手嘅話，費Sir隨時臨老唔過得世㗎！
再講，曼聯上季威盡，啲主要對手唔發茅至奇，睇車路士準備再大事擴軍，而利物浦來勢洶洶，淨係一個喺歐國盃威盡嘅費蘭度托利斯已經難應付。守業難過創業，費Sir放完假，嚟緊一年怕且有排捱。