杜汶澤話「拉拉手掣、擺一擺籮柚，咁咪甩尾囉！」真係咁易？莫講話真人飄移，就算任炒唔嬲嘅打機世界，甩尾都唔係咁易控制。最新街機《頭文字D》第四代剛移植至PS3，雖然港版無得Online揪日本仔，但我哋搵嚟專煲街機嘅𡃁仔拓海，惡鬥現實中一班掃把佬、露筍車手，睇吓到底係𡃁界拓海快，定成人版涼介勁！
記者：徐影龍
攝影：王文忠
PS3《頭D》熱辣到港，本來諗住搵番漫畫入面都有出現過嘅勁車撐場，順便叫班車主嚟番場牙骹戰，鬼叫套漫畫吹到架AE86天下無敵。當日一班掃把佬、露筍同飛雞車主，一心為自己愛驅牌頭而戰，點知大家磨拳擦掌之際，先知今日用PS3手掣鬥車！無辦法啦，好多網友測試過並非支援太多遊戲軚盤，而官方只推薦GTForceRX同G25兩款貴到嘔嘅軚盤，大家惟有將就吓喇。
𡃁仔贏大人12秒
由於亞版《頭D》不支援Online對戰，就連單機雙打都欠奉，所以就用時間嚟分勝負。先由甩尾王海堂出場熱身，揸番飛雞SilviaS14，直路起步好哋哋，點知一個S急彎已露晒底，左右喪炒似玩波子機；最後捱到第三個CheckPoint已經TimeOver，連最出名嘅五連髮夾彎都見唔到呀陰功！我開始感覺唔對路，結果接續而上嘅幾位掃把佬車、Evo車主，最後連AE86車主都舞唔掂隻Game，只有少數人喺限時內走完全程，但時間並不可觀。喂，唔係鬥慢喎！
呢個時候，今日跟我嚟趁熱鬧嘅姪仔儍B，施施然行出嚟，粒聲唔出拎起個手掣，Cool到爆咁揸架AE86，好純熟咁跑完秋名山下坡道。第一次玩已造出3分27秒成績，比3分39秒紀錄快12秒，搞到在場成班車手得啖笑。
雖然甩尾王海堂好認真咁玩，但揸咗幾轉都唔到終點，Next！
AE86車主Victor情況唔好得幾多，甩嚟甩去都走唔足全程。
車界杜琪峯玩番最拿手嘅SubaruWRX，跑3分39秒，唔錯。
肥仔拓海：「我啲《頭D》卡仲多過你嘅信用卡，同我鬥？」
自閉《頭D》當操機
本來PS3版《頭D》挾住街機第四代氣勢，在港有一定叫座力，無奈臨推出前，代理證明港版不能跟日本Server連線對戰，即係得番Offline玩！好彩CapcomAsia即時宣佈降價至$299，兼送《頭D》電話繩，計番條數比早前嘅PSP版仲抵。有網友就話反正《頭D5》就嚟出街機，有番難度超高嘅八方原山路，打PS3版咪當操機囉，好過喺街入5蚊一鋪吖。
老實講，PS3版畫面跟街機一樣咁普通，車同背景造得一啲都唔仔細，不過耳仔享受出奇地有驚喜。首先各車種引擎聲營造得頗細緻，我都分得出NA偈同Turbo偈把聲有乜唔同，尤其Replay時兩車劃過畫面，好明顯兩副引擎聲由左至右飆走，幾High㗎！最正係PS3版收錄足足17首《頭D》歌曲，幾乎每款車系都有其主題曲，聽番《DiveIntoStream》真係相當熱血，阿儍B一路玩一路跟住唱，睇個勢大個咗都係電車一族。
PS3《頭文字DExtremeStage》
遊戲類型：競速
對應機種：PS3
遊玩人數：1人
開發商：SEGA
行貨售價：$299（頭批送手機繩）
