不愛豆腐店拉花

早幾年《頭D》興起，AE86如神降臨，港九新界個個爭貼「藤原豆腐店」拉花，對白色Trueno各系已屬指定動作，就連小巴、貨Van甚至五噸半司機大佬，都喺女人街買番張貼喺車尾，個個自詡藤原拓海上身！Victor專誠託朋友喺日本搵嘅AE86，連改裝翻新花費超過十萬，偏不屑隨波逐流，「我唔鍾意豆腐店拉花。」

記者：徐影龍
攝影：王文忠

隔籬Game版做《頭D》，車版專登搵番幾部喺遊戲度登場嘅辣車襯番吓，甩尾王海堂答應揸架飛雞S14出嚟，仲有四代Evo、SubaruClub嘅單門WRX等，最難得係香港僅得幾架嘅主角車AE86都會蒲頭，齊聚將軍澳工業邨，熱鬧程度拍得住周董套真人版。

■揭燈版AE86最珍貴，翻新同執件相當耗時間，但車主卻不貼經典拉花。

唔係為《頭D》買車

Victor千辛萬苦託朋友喺日本搵架AE86，原來並非受《頭D》影響，「三年前買入，其實《頭D》熱已過咗，你睇我連必貼嘅藤原豆腐店拉花都冇，就知我係真心欣賞呢架八十年代經典尾轆車啦。日本仍現存不少揭燈版AE86，做劏車場嘅朋友就幫我搵咗架84年出世嘅Trueno，連運費都只係六萬蚊，不過車齡太大，索性出個老爺車牌喺街行。之後花多五萬翻新同改裝，亦最耗時間，始終咁古老嘅原廠嘢好難搵齊，好似兩對原裝15"軨，就花咗我幾個月周圍Bid。」
「坦白講，AE86幾難揸，好易甩，有時落雨行直路都要打醒十二分精神，最慘係成日俾Civic撩，我邊夠VTEC鬥吖，咪讓佢行先囉，到我換咗部DreamCar（GT-R）睇吓仲敢唔敢撩我？」

■Victor周末會跟朋友嘅DC5、S2000等名車「暢遊」鹿頸。

■原裝15"軨好難搵，仲要分開一對一對咁上網Bid。

■Trueno本屬豐田Corolla分支，點知架AE86威震天下。

■車側「藤原豆腐店」可算《頭D》靈魂標誌，Victor偏偏唔貼。

起碼要換Turbo偈

錢家班兩位甩尾高手海堂同阿帆，雖然當日揸咗架S14嚟撐場，但海堂仍對AE86讚口不絕：「我同《頭D》顧問土屋圭市傾過偈，大家都認為當年車壇，AE86操控性同馬力的確好標青，車架夠輕，軸距比例亦令大幅度甩尾依然靈活，跟RX-7、三代Evo等車王比都唔輸蝕，外形到今日睇仍然好有格。」
阿帆就插嘴話八十年代尾轆車屬日產勢力範圍，居然俾豐田攝到位，就知架AE86有幾得。現今汽車科技太先進，我就會換台SR20Turbo偈落去（即S14、S15引擎），令架AE86Keep住有得玩。

■兩人鍾情飛雞，建議AE86車主換佢哋嗰台Turbo偈。

■呢架S14屬錢家班表演及比賽之用，誇張拉花令全場側目。

唔好嘥NA車特性

Subaru近年從良入屋，變晒旅行車，可幸今日SubaruClub拉隊出現，見番唔少辣跑掃把佬風範，尤其呢架單門版ImprezaWRX就更矜貴。另一位揸九代嘅會友楓仔，就不同意海堂換Turbo偈嘅睇法，「我會換S2000副FC20偈畀佢，唔好嘥咗NA車（自然吸氣）嘅特性，高轉時會瘋狂啲，而且頭中尾段都有力，唔似Turbo車咁易腳軟。

■市面上好難見到單門WRX，輝哥話打死都唔賣。

■單睇WRX車頭，感受番久違咗嘅掃把佬風采。

■楓仔強調SubaruClub唔係飛仔會，今日得見幾位掃把佬車主，我信你！

AE86耐玩性高

雖然我都覺得原著神化咗架AE86，不過呢架車真係好經典，潛力及耐玩性都好高。而我呢架露筍四代嘅轉彎感覺跟AE86好唔同，揸咗差不多四年，買返嚟都無乜執過，只係換Brake同翻噴過一次油，好滿意。若然要換車，會揀番新啲嘅八代。

■Franki話最常喺東廊俾人撩，不過唔會受挑釁。

■全車外圍最鍾意個尾翼，大得嚟又唔太浮誇。