內地樓市回調，搞到北大教授徐滇慶要登報向深圳市民道歉，呢位教授究竟做錯乜嘢事？
怨畀人做娛樂新聞
據大陸《每日經濟新聞》話，舊年7月11號，佢喺深圳出席一個論壇時評論深圳樓市時話：「深圳樓價肯定要漲。」本嚟評論嘅嘢各抒己見，大家都係參考吓，點知徐教授攞評論嚟開盤口話：「我們不妨再豪放一點──如果明年（即今年7月11號）深圳房價比現在低一分錢，我一定在媒體上用整版篇幅向深圳市民道歉。」
時限越嚟越近，徐教授到6月30號都仲企硬話，深圳樓價冇跌，絕不道歉。點知第二日，佢就喺嗰blog度登道歉信，劈頭就話：「我向深圳人民道歉。」說話錯在「簡單地預測樓價，好易被人攞嚟做娛樂新聞，又錯在估唔到美國次按產生嘅信心危機影響咁大」，但佢堅持深圳樓價上升係一個長期趨勢。
據講徐教授喺《南方都市報》訂咗個全版廣告位，據講全版黑白要14.2萬人仔，彩色就20萬。你估徐教授揀邊款呢？