新地（016）大股東郭氏家族兄弟相爭，家事鬧上法庭，前主席郭炳湘被貶為非執行董事，勞動79歲嘅母親大人鄺肖卿出任公司主席，平息家族紛爭，雖然事件令新地形象受損，但就冇影響一家人攜手撐新地股價。
據港交所資料顯示，上個禮拜三開始，佢哋連續3日增持合共48.8萬股新地，可惜股價越買越跌，上個禮拜三至今新地跌咗8蚊，佢哋亦越買越少。其實，郭氏家族早喺今年5月初已經開始密密增持新地，先後8次買入公司178.4萬股，由140.6蚊開始吸納新地，涉及金額2.2億港銀，以噚日新地104.3蚊計算，賬面唔見3000幾萬銀。
越買越跌年底升番
唔通真係兄弟齊心，其利斷金；兄弟分心，唔見桶金！咁又唔係噃，近呢幾年，郭氏兄弟都試過連續增持新地股權，起初都係越買越跌，但到年底計數，郭氏兄弟往往大有斬獲。
以舊年為例，郭氏兄弟喺5月由93.3蚊開始增持，先後8次買入咗400萬股，涉及金額3.7億銀，當時新地股價一度跌到89.2蚊，但到年尾，新地股價升番去165.6蚊，郭氏兄弟賬面賺逾3億銀；至於06年嗰次，郭氏兄弟年底埋單計算賬面亦賺近2400萬銀。
股價越跌越買，唔係人人做得，如果好似郭氏兄弟咁有米，當然無妨，如果唔係，都係寧買當頭起，風險冇咁高。
郭氏家族增持新地股權
開始增持日：2/5/2008 增持次數：8*
買入股數：178.4萬 涉資：2.2億元 股價變幅#：-25.8%*
開始增持日：21/5/2007 增持次數：8
買入股數：400.0萬 涉資：3.7億元 股價變幅#：+77.6%
開始增持日：24/5/2006 增持次數：4
買入股數：242.5萬 涉資：1.9億元 股價變幅#：+11.1%
註：*增持至今 #增持日至當年底
資料來源：港交所及彭博資訊
電郵：mailto:[email protected]