Ole！西班牙贏了。荷蘭原是左丁山第一選，輸咗畀俄羅斯之後，就捧西班牙為歐洲國家盃冠軍首選，西班牙卒之六戰六勝，準決賽贏俄羅斯三比零，清脆利落。決賽小勝德國一比零攞冠軍，看似緊張，實則德國隊全場冇乜埋門威脅，只有隊長波歷克射過一腳波，柱邊出界，叫做要西班牙守門員卡斯拿斯（按照英國評述員嘅發音，譯音應該係卡蕭亞斯）撲到撻落地下。西班牙全場佔盡攻門優勢，但只射入一球，顯示出佢哋孭住44年冇攞過冠軍嘅負擔，心理壓力甚大。
八月下旬歐洲聯賽開鑼後，相信西班牙以外嘅球隊都會學習西班牙嘅踢法：三角短傳，長短棍兼施，控球在腳，地面推進，球員走位移動快速，無固定位置，前鋒與中場球員皆可射門入網，靠的是技術、速度與整體合作。阿仙奴有費比加斯，成隊踢法基本上與西班牙相同，只是阿仙奴隊內冇沙維、恩尼斯達、施華與冼拿呢。曼聯如果keep得住Ｃ朗，可以打出西班牙本色！
波歷克輸埋呢場，就係第十次攞亞軍（德甲、英超、世界盃、歐洲盃），只能嘆句命中如此，令人同情。成隊德國隊冇另一位世界級球員，波歷克獨力難支，能夠進入歐洲盃決賽，已算有交代，下一季歐洲盃冇波歷克份咯。反之，西班牙隊全隊年青力壯，在二○一○年可以挑戰世界盃，二○一二年仍然有力衞冕歐洲盃。唯一缺憾西班牙教練阿干尼斯就快七十歲，西班牙足總又唔肯加佢薪水（嫌佢老啩），領隊一職即將換上新人。以西班牙人喜歡「內閧」嘅性格，冇咗一位大膽棄用國寶魯爾嘅老教練，新領隊唔知可唔可以鎮得住。
西班牙勝利，係漂亮主攻足球嘅勝利，德國、意大利、法國呢三隊老牌勁旅暫時係咁先，只有葡萄牙、荷蘭、俄羅斯可望追上。左丁山講過，如果由意大利對德國爭冠軍，會係悶鬥悶，代表足球冇進步力量。𠵱家好咯，技術型年青隊伍擊敗戰術型傳統隊伍，世界畢竟係向前進嘅，守舊不變冇希望！